Vawiin chawhma dar 10.30 khan Booth Level Officer (BLO) te hnena electoral roll ennawn dan zirtirtu tur Electoral Registration Officer leh Asst. Electoral Registration Officer te puala buatsaih Trainers’ Training chu Agriculture Conference Hall-ah tan a ni a; 27.8.2011 thleng awh tur he training hi Pu K. Riachho IAS, Chief Electoral Officer chuan a hawng.

Pu K. Riachho chuan democracy ramah chuan inthlanna felfai neih a tul a, chutiang nei thei tur chuan electoral roll felfai tak neih a ngaih avangin Election Commission of India thupek anga Special Summary Revision hi India ram state zawng zawnga neih a nih tur thu a sawi a. BLO-te chu uluk leh fimkhur theih tawp chhuaha electoral roll-a 1.1.2012-a kum tling tharte ziak lut tur leh India khua leh tui ni lo leh Mizoram pawn lam mi, Mizoram-a cheng nghet lo te ziah luh chungchanga tihsual palh nei lo tura dan zawm turin Pu K. Riachho chuan BLO-te chu a chah bawk.

BLO-te puala training hi mi 40 zel tan tum thum buatsaih a ni dawn a; 22-27.8.2011 inkar hian batch khatna leh batch hnihna training chu Aizawl-ah neih a ni ang a; a vawi thumna chu 29-31.8.2011 inkar khian Lunglei-ah buatsaih a ni ang. Training chhuak mi 120-te hian Mizoram puma BLO 1031 te hnenah electoral roll ennawn dan tur an zirtir chhawng leh dawn a ni. Mizoram-ah vote nei thei tura inziak lut tawh zawng zawngte chu Voter’s Identity Card pek vek an ni tawh a; hemi kawngah hian Mizoram chu India ram state zinga tihlawhtling thei 7-na a ni. Booth Level Officer-te kaihhruaina tura Election Commission of India-in lehkhabu a buatsaih chu Mizo tawnga chhut chhuah a ni tawh bawk a ni.

Training hawnna inkhawm hi Pu H. Lalengmawia, Jt. Chief Electoral Officer chuan a kaihruai a ni.