Tunlai Coronavirus (COVID-19) hri leng vanga ei leh bar kawnga hlauhthawnna awm thei chungchang ah Lunglei District mipuite tan hriat tur thil pawimawhte a hnuaiah hian tarlan a ni e.
He hri leng mek laka lo invenlawkna leh inpuahchah dan ngaihtuah tur leh kan ram leh district dinhmun te thlir hovin Lunglei District Task Force on Coronavirus pawh dt. 12.3.2020 khan thutkhawm a ni a. Kan ei leh bar thil (essential commodities) lama kan dinhmun ah hlauhthawnawm a awm lova, buhfai pawh District pumpui ah March thla quota tur kan dah vek tawh a ni. Tin, FCI Godown, Lunglei ah hian April/2020 thla quota daih stock a awm sa a. Fur atana inbuatsaih lawk ngaihna Centre thenkhat ah phei chuan fur chhung daih tur (Monsoon Stock) Oct/Nov thla thleng daih dah ngah tawh an ni bawk.
POL – Motor oil, Diesel leh Petrol te leh LPG dindhmun pawh a tha a. Fuel phur tank lorry pawh ramri checking avanga muang thei deuh awm mahse load pangngai lo kal tur a awm reng a. Chawhmeh leh buhfai phur motor te pawh Vairengte Check Gate atanga report kan dawn angin tun dinhmun ah han hlauh thawn thut tur a awm lova, sorkar in bungrua leh ei leh in tur phur motor a chaw lut reng a, nidang ang thoin a pangngai in mipui mamawha lo lut reng a ni. Dawrkai leh sumdawng ten bungrua leh an zawrh sum te lo chhep rel lova mitin mamawh tawk ang zel a pe a, lo inhralh tura ngen an ni a. Mipuite pawhin zawm a, chi ai lo turin kan inhriattir e.
