Vawiin khan Transport Minister Pu TJ Lalnuntluanga’n a pisa, Mizoram New Capital Complex ah Road Safety Week, 2020 a hawng. Road Safety Week vawi 31-na Mizoram puma hman tan mek hian March ni 22 thleng a awh dawn a. Thupuiah “Dan zawm hi himna a ni” tih an thlang.

Pu TJ Lalnuntluanga chuan kum danga lian tham taka Road Safety Week hawnna programme hman thin chu novel coronavirus laka mipuite him nan leh sawrkar duh dan angin puipunna lian huaihawt lovin Transport officer-te nen a hawnna hun hi a pisaah siam a nih thu a sawi. Dan zawm hi himna a ni tiin Transport Minister chuan lirthei khalhtute, lirthei neitute leh mipui mimirin lirthei kaihhnawiha sawrkarin dan a siamte chu zawm turin a chah a. Kum khat chhungin India ramah lirthei chetsual vanga thi mi nuai khat leh sing nga chuang an awm tiin lirthei khalh fimkhur loh avanga kum tin chhiatna rapthlak tak tak thleng thin hi dan zawm avangin tam tak pumpelh theih a ni tih a sawi a, fimkhur taka lirthei khalh thin turin mipuite a chah a ni. Pu TJ Lalnuntluanga chuan mipuite rilru sukthlek dan siamthat pawimawhzia sawiin thiltithei nih duh avanga dan zawm famkim lova thil tih tum bansan a tul, a ti a. Sawrkarin veng seng vek lo mah se mimal tin ten mahni leh midangte tana malsawmna leh himna a nih hriain sawrkar dan leh kaihhruaina zawmtu khua leh tui tha nih tum turin mipuite a fuih a ni.

He hunah hian Transport Director Pu R.Lalrammawia chuan Road Safety Week hman dan sawifiahin Transport Minister Chairman-na hnuaiah Mizoram State Road Safety Council chuan kum tin Road Safety Week hman hun tur a rel thin, a ti a. “Lirthei khalh fimkhur hapta hi kum tin kan hawng a, kan khar leh tawh ngai lo”, a ti. Hei hi kumtluanin mipuiten fimkhur a tul zia an hriat theih nana tih a nih thu a sawi.

Driving License lem siam chungchang vawiin hian sawilan a ni a. Driving test paltlang lova driving license cheng sangthum vela lei theih anga thu thang chungchang leh social media thlenga hmuh theih a awm te chu chhui chian a nih thu te, dan bawhchhetute case siam sak an nih thu leh license lem sang chuang man a ni tawh thu tarlan a ni. Transport in dan anga a pek chhuah license ah hian chip phum a ni a, he chip hi Transport Department IT Cell atanga tih nun (activate) a ni. A lemah hian chip ang tak awm ve mahse khawl chhiar theih (machine readable) a ni lo.Driving license lem siam thin te laka fimkhur tur leh dan ang taka driving license dil thin turin Department chuan mipuite a chah a. Tax leh fee chungchang pawh sawi lan niin Department system-a la awm, lirthei kum 15 tling tawh, registration thi tawh 45,000 chuang a la awm a. Department chuan hetiang motor kawltute hi accident tawh palh thulah dan anga fee leh tax an pe lo a nih chuan insurance policy nei tan pawh claim theih a ni lo tih sawiin DTO hnenah lirthei neituten tifel vat turin an hriattir bawk a ni.

Aizawl bakah District headquarters-ah te District Road Safety Committee bultumin Road Safety Week hi hman a ni a. He Week hman chhung hian No Tolerance Checking kal pui a ni bawk a. Traffic leh Transport Department chuan kumin hian a hrang ve ve in lirthei endik hna an thawk. College zirlai ten Road Safety thutiam an lak theih nan Higher and Technical Education kaltlangin Principal te hnenah lehkha thawn a ni a. March ni 17 leh 18 chhung hian Hlimen-a Transport Department hmunah two wheeler taxi bik endik runpui neih a ni dawn a. Tun dinhmunah two wheeler taxi 498 a awm mek. School Education Department kaltlangin school zawng zawngah period khat tal road safety chungchang inzirtir hun an hmang dawn bawk a. March ni 17 zanah AIR, Aizawlah Road Safety inhrilhhriatna live phone in programme hman a ni bawk ang.

Vawiin programme hi Transport Commissioner & Secretary Pu KT Beicho chuan a kaihruai a. Tranport Department Officer te an tel.