Mizoram State Level Task Force on Mitigation of Coronavirus (COVID-19) duhdan bawhzuiin Transport Department chuan Mizoram mipuite COVID-19 lakah kan him theih nan March ni 11, 2020 khan thupek a ti chhuak a. Passenger phur chi lirthei - Interstate Bus, Tourist Bus, Tourist Taxi, Line Bus, khua leh khua inkara tlan chi maxi cab, rental car ten an passenger phurhte hming, address kim chang, phone number leh an kalna hmun tur (destination) chiang taka ziakin register-ah chhinchhiah turin a ti a. Khualzin phur lirthei interstate service chi reng reng chuan uluk takin passenger list hi an vawng reng tur a ni. Heng list te hi thuneituten an en duh emaw a copy an duh emaw a nih chuan a tul anga pe nghal thei tura inring turin an hriattir bawk. Counter agent license neitute pawhin an hnen atanga ticket la reng reng an hming, address kimchang, kal duhna hmun leh contact number felfai taka vawn tur a ni bawk.

COVID-19 chungchangah Transport Department chuan an Commissioner leh Secretary Pu KT Beicho hovin meeting pawimawh tak an nei a. He meeting-ah hian mipui mimir phur thin Public Transport motor-a seat, ban leh vawnchhan te uluk taka tifai thin turin advisory tichhuah an rawt a. He advisory hi tihchhuah a nih atangin a taka zawm a ni leh nih loh vil zui tur leh an hmalakna report kar tin Transport Department ah thehlut thin turin Joint Director (Operations) leh District Transport Office tin te an hriattir bawk a ni.

Transport Department chuan COVID-19 laka inven nan kutzungtanga nemna biometric attendance an lak thin pawh tih tawp nghal an rel a. An Department hnuaia office te chu uluk thei ang bera nitin vawihnih tal tihfai thin an tum bawk a ni.