Kumin March Ni 16 atanga 22 chhunga hman tur Road Safety Week tum 31-na, ‘Dan zawm hi himna a ni’, tih thupui hmanga kalpui tur chu vawiin khan Champhai Bawrhsap leh District Road Safety Committee Chairman nibawk Pu SL Naveen, IAS chuan DC Conference Hall-ah a hawng.

Bawrhsap Pu SL Naveen chuan India ramah kum tin Lirthei chetsualna avangin mi nuai 2 dawn an thih thin thusawiin, Lirthei chunga thihna thleng tam ta lutuk chu pawi a tih thu leh tun aia nasa zawka inzirtirna kalpuia, fimkhur zual angaih thu a sawi a. Road Safety Week hman chhungin Lirthei khalhtu leh mipuite hnena himna leh fimkhur zirtirna huap zau thei ang bera kalpui a tul thu a sawi a. Road Safety Week hman tur chuan Lirthei chunga thihna nuaibo kawngah kawngro a sut ngei a beisei thu sawiin a hawng a ni.

Hawnna hun hi Pu K.Lalhmuakliana, District Transport Officer (DTO) & Member Secretary, District Road Safety Committee chuan a kaihruaia. Lirthei chunga thihna thlen chhan hrang hrangte tarlangin, za zela 75 dawn chu Lirthei khalhtute thiam loh vang anih thu leh za zela 4.7 chu ke a kalte thiam loh vang anih thu a sawi a. Road Safety Week chhungin Enforcement leh MVI lam te’n khauh lehzualin endik hna an kalpui tur thu sawiin, dan zawm lote dapchhuakin hremna an pe dawn a, dan ang taka thil tite tan hlauhthawn tur a awm lo a ni, a ti a. Nu leh pate chu kum tlinglo Lirthei khalh phalsak lo tura ngenin, Lirthei khalh phalna neite pawh fimkhur tur leh hawihhawm lehzual turin a chah nghal bawk a ni.

He hunah hian Pu Joseph Lalhnehzela, Sub-Inspector, in-charge Traffic Champhai hnen atangin Road Safety kaihhnawih thusawi ngaihthlak a ni a. Lirthei khalhtute zingah kumtlinglo dan bawhchhia an tam ber thu sawiin, rui chunga Lirthei khalh leh document nei mumal lote dapchhuaha hremna lekkawh hna chu Road Safety Week chhung chauhah niloin, nakin zelah pawh kalpui tum anih thu a sawi a. Lirthei khalhtute chu mawhphurhna sang tak an nei tih inhre thar leh tura chahin, mipui himna leh nunna an chungah a inghat thui hle a ni, a ti a. MVI Act hmangin kumin chhungin mi 3 hrem an nih tawh thu pawh tarlangin, Lirthei khalhtute ang bawkin ke a kalte pawh kan fimkhur angai hle a ni, a ti bawk. Lirthei khalhtute chu hawihhawmna nunpui tur leh an Lirthei dinhmun enfiah hmasa fo thin turin a chah a. Nikum chhungin Lirthei chetsualna vanga thihna thleng 3 ziahluh anih thu sawiin, Mipuite chu Driver fimkhurlo, tlan chak leh an tana himlo tura ngaih an awm anih chuan a ranglama Police-te hrilhhre nghal vat thin turin a ngen nghal bawk a ni.

Pu K.Lalhmuakliana, DTO & Member Secretary, District Road Safety Committee chuan lawmthu sawiin hawnna hun hi a khar a ni. He hunah hian Champhai District Road Safety Committee member-te an tel a ni.