Tukin khan Sports Minister Pu Robert Romawia Royte chuan Aizawl South-II huam chhunga hmun pawimawh thenkhatte a tlawh.

Minister chuan Thakthing YMA Zawlbuk, 1939 atanga din tawh tihchangtlun dan tur a hmunah enin khawtlang hruaitute nen an sawi ho a. Cheng nuai sawm senga Badminton hall leh tul dangte thawh dan tur sawi ho a ni bawk. Thakthing khawtlang hruaitute hmaah thu sawiin Pu Robert Romawia Royte chuan Pu Zoramthanga kaihhruai sorkar chuan thalaite infiamna hmakhua thlirin Sports Revolution thlentir an tum thu a sawi a, Union budget leh foreign funding atanga sport tihhmasawnna kawng chak taka buaipui a nih mek thu a sawi bawk.

Salem Veng a Futsal Ground siam tumna hmun tlawhin a chak thei anga hmalak a duh thu a sawi a, Department Officer-te chu design leh drawing te siam rang turin a hrilh nghal a ni.

Sports Minister hian Rajiv Gandhi Stadium bula Sports Hostel cheng nuai zariat senga sak mek a tlawh a. He buiding sak hna hi B.M. Infrastructure ten thawkin tunah hian zaa sawmriat vel thawh zawh tawh a ni a. Hna tha lo laite siam thaa uluk taka thawk chhunzawm turin Minister chuan thawktute a hrilh. He hostel chunglam hi Hall lian atana sak chhunzawm dan tur an enho bawk a ni.

Dam Veng Y.M.A hall tlawh lehin khawtlang hruaituten an hall zauh-a chei that an duhdan a hnena an thlen chu a tul anga enpui zel a tum thu a sawi bawk.

Sports Minister hi Prof F.Lalnunmawia, MLA & Vice Chairman, Horticulture Development Board; Pu C. Thansanga, Councillor; Pu John Tanpuia, Jt Director Sports and Youth Services Department; Pu C.Laltlanthanga, Secretary Mizoram State Sports Council bakah official dangten an tawiawm a ni.