Mizoram Legislative Assembly hnuaia Committee on Estimates chuan ni 3-4 February, 2015 chhung khan Industries Department hnuaia Bamboo Development Agency hmalakna hmun hrang hrang te an tlawh a, sum hmanna leh a taka a hmuna an hnathawh dan te an enfiah a ni. Estimate Committee hian Bamboo Wood Park for Export, Zamuang leh Zawlnuam te, Bamboo Wholesale & Retail Market, Bungthuam te, Export Promotional Industrial Park (EPIP) Lengte, Bamboo Chipping Unit atana Plant & Machinery, Chuhvel leh Mizoram Venus Bamboo Products Pvt. Ltd., Sairang te an tlawh a ni.

Heng hmuna mau sawngbawl nana BDA sum senral leh hmalak dan te uluk takin an enfiah a, mau lei leh hralh bakah khawl hmanga mau sawngbawlna kawnga harsatna industry dintu ten an tawh avanga an hmalakna a thuanawp dan te an inhrilhfiah a. Harsatna hrang hrang avanga sawrkar sum tam tak senga mau sawngbawlna industry te a thuanawp thin siamthat nan hmalak zel dan tur te an sawiho.

Committee on Estimates hian Bairabi-Zamuang kawnga Tlawng lei Bairabi-a dawh mek an tlawh bawk a, PWD Chief Engineer Pu K.Lalsawmvela’n an hnathawh dan leh thlen chin te a lo hrilhfiah. He lei siam nan hian sum Rs 12.523 crores ruahman a ni a, kumin May thla chhung hian zawh hman tumin ngawrh takin an thawk mek a ni. Estimate Commitee hian Sihhmui-a Tlawng lei dawh hna kal mek an tlawh bawk.

Committee on Estimates ah hian MLA paruk an awm a, Chairman Pu Lalrinliana Sailo niin member dang te chu Dr Ngurdingliana, Pu Vanlalzawma, Pu T.Sangkunga, Pu R.Vanlalvena leh Pi Vanlalawmpuii Chawngthu te an ni. Assembly Secretariat leh Industries Department officials ten an tawiawm bawk a ni.