Mizoram a Film & Television Institute dinna tura ram en tura rawn kal Satyajit Ray Film & Television Institute (SRFTI), Kolkata, Central sawrkar hnuaia din Inspecting Team chuan nimin chawhnu khan Information & Public Relations Minister Pu Lal Thanzara chu a office ah an hmu a. Minister hovin Film Institute dinna tur hmun chungchang sawihona neih a nih hnu hian Inspecting Team hian Mizoram a film siamtute leh Film Development Society nen Chief Minister’s Conference Hall-ah inkawmna hun an hmang.

Inspecting Team hian Film Institute dinna hmun Mizoram in a neih theih dan kawng a awm leh awm loh chu an hriat duh ber leh an rawn kal chhan a nih rualin Mizo thalaiten film siam an tuipui em tih hriat a pawimawh thu an sawi Minister of State, Information & Public Relations Pu Lal Thanzara chuan Chief Minister in thalaite tan khawvel thar siam a phurpui in nasa taka hma a lak tawh thu leh film siamna kawngah pawh thalaite tuihalna a tawmpui thu a lo hrilh a.

Chief Minister Pu Lal Thanhawla’n Film & Television Institute din chungchang a phurpui thu Pu Lal Thanzara chuan Inspecting Team te alo hrilh a ni. Chief Minister’s Conference Hall a inkawm hona ah Inspecting Team chuan SRFTI chuan thiamna petu an nih thu leh Mizo Film Makers te pawh State sawrkar nena thawhhona hnuaiah Training emawm workshop te pawh pe thei turin an inhawn reng thu an hrilh a. Mizo Film siamtute chu an kutchhuak film siam tawh te, an hmalakna leh an hmachhawp te hriattir turin an sawm a.

SRFTI Inspecting Team member lokal te hi Pu Sanjaya Pattanayak, Director, SRFTI, Prof. Debasish Ghosal, HOD, Sound & Designs leh Pu Pankaj Seal, Associate Professor te an ni. SRFTI hotute hian Mizoram hmelhmang chu mawi an tih thu sawiin Film leh Photo Shooting neih nan pawh duhthusam in eng a tha in a mawi a ni an ti. Mizoram ah Film & Television Institute din a nih theih nan Chief Minister’s Office hmalakna hnuaiah Nodal Department Information & Public Relations leh Revenue Department thawhpuina pawh an mamawh tur thu an sawi a ni.