Vawiin chawhma khan Mizoram Legislative Assembly hnuaia committee peng pakhat Committee on Estimates chuan an Chairman Pu Lalrinliana Sailo, MLA hovin Tourism Department hnuaia Tourist Lodge, Serchhip sak mek bakah, Home Department hnuaia Sainik School, Chhingchhip a sak mek te, Industry Department hnuaia Bamboo Development Agency kaltlanga bul tan M/s S.K. Bamboo Chipping Mill, Chhingchhip-te chu a hmunah tlawh in an enfiah.

Chhingchhip ‘Rihte Ram’ a Sainik School sak mek an tlawhna ah Estimates Committee member te chuan Contractor te kutthlak tawh chin chu tha thawkhat hle a an hriatthu sawiin hna erawh an thawk chak tawk lo deuh a an hriat thu an sawi a; Contractor-in February, 2015 a zo fel hman tura a insawi chu a tun dinhmun atanga en chuan a harsat an rin thu leh tuna hnathawktu 90 lek an chhawr chu tlem an tih thu an sawi a, a let thum tala hnathawktu hi tipung tura an hrilh chu Contractor pawhin zawm a tum thu a sawi a ni. Estimates Committee Chairman Pu Lalrinliana, MLA chuan Mizorama Project pawimawh tak tak te hi a satu Contractor muangchan vanga anih tur ang ni pha ta lo an awm fo thin tih sawiin Sainik School pawh hi a hun takah zawh anih loh chuan a chhawr tangkai tur zirlai thahnem tak kumtin kan chan dawn a hei hi a pawi hle a ni tiin Contractor te chu an hnathawh chak dan leh hmasawn dan hrechiang turin a khat tawka a hmuna tlawhin an vil reng tawh dawn ani tih a hrilh bawk a ni.

Chhingchhipa Sainik School sak anih theihna tur hian chhungkaw 44 in ram Hectare 100 chuanga zau a thlawnin an pe a, a panna kawng (approach road) pawh chhungkaw 17 zetin a thlawnin an pe bawk a ni. School sakna tur zawng zawng hi Rs.100.33 crores (NLCPR atangin 50.33 crores leh 13th Finance Commission atangin 50 crores) a ni a tunah hian Rs. 3773.35 lakh sanction tawh niin, Hindustan Prefed Ltd. (HPL) te Executive Agency niin an hnuaiah hian Prasad & Co., (Project Works), Ltd. ten construction works hi an khawih a ni.

Bamboo Development Agency, Industry Department kaltlanga tanpuina a sak M/s S.K. Bamboo Chipping Mill pawh Estimates hian tlawhin Mill neitu Pu Saikhuma, Chhingchhip chuan Estimates Committee member te hnenah Mau hralhna man (rate) ennawn mek anih avangin an hralhna ber HPCL, Cachar hnenah engemaw chen chu a hralh theih tawh rih loh thu a lo hrilh a; raw materials lak lama harsatna aneih loh thu leh Rate thar siamfel anih veleh hma lak chhunzawm lehnghal anih tur thu a lo hrilh a ni. M/s S.K. Mill hi Bamboo Development Agency kaltlanga tanpuina sum Rs. 69.69 lakhs hmanga din a ni a, Industry Department leh Bamboo Development Agency ten an hnathawh leh hmalak dan an vil reng thin a ni.

Khawtetlang, Serchhip-a Tourist Lodge sak mek an tlawhna ah District Bawrhsap Pi Juhi Mukherjee, IAS chuan Estimates Committee te chu lo dawngsawngin Tourist Lodge thar neih an nghahhlelh tawh thu leh tun thlenga an hmasawnna a hmuh dan tlangpui te a lo hrilh a, Committee member te chuan Building sak hna chu tha thawkhat hle a an hriat thu an sawi rualin hawn vat anih loh chuan Building in a tawrh a hlauhawm thu an sawi a, Serchhip-a Tourist Lodge awm hun an nghahhlelh thu leh hmabak la awm te pawh rang taka zawhfel anih theih na tura tan la turin Tourism Department hotute leh District Bawrhsap te an chah a ni.

Tourist Lodge, Serchhip hi estimate hmasa ah chuan Rs. 45 lakhs a sak tura tih a ni a, harsatna hrang hrang vanga kum engemaw zat a sak hna chawlhsan anih hnu in tharthawh leh a ni a, estimate siam that leh niin 2014, April atang khan sak chhunzawm leh a ni a, revised estimate ah chuan Rs. 172.02 lakhs a sak zawh tur a ni. Tun dinhmunah hian Main Building leh Cottage pathum sak zawh tawh niin, a chhung electrification leh furnishing chiah hmabak a awm tawh a ni.

Vawiina Serchhip leh Chhingchhip tlawhtu Estimates Committee Member te chu : 1) Pu Lalrinliana Sailo, Chairman ; 2) Dr. Ngurdingliana, Member ; 3) Pu Vanlalzawma, Member ; leh 4) Pu R. Vanlalvena, Member, te an ni a, an member pakhat Pu T. Sangkunga erawh chu a nupui damlohna avangin a tel ve theilo a ni.

Estimates Committee hian Serchhip leh Chhingchhip an tlawh hnu hian Lawngtlai panin an chhuak lehnghal a ni.