Vawiin chawhnu her ah khan Rural Development Office Conference Hall ah Rural Development Minister Pu R.Lalzirliana hovin kum 2013-2014 chhunga Border Area Development Programme (BADP) tanpuina sum hmanga hnathawh zawh tawh te zirchian niin kum 2015-2016 chhunga hmalak leh dan tur te rel a ni.
BADP Review meeting a thusawitu, Rural Development Minister chuan sawrkar hnathawkte tan chuan an eizawnna hmun chu midangte tana rawng an bawlsakna hmun a ni tih an chian phawt chuan mipui tan dawr an hreawm ngai dawn lo a ni a ti a. Sawrkar laipui in kalphung a her danglam deuh vek avangin sum harsatna pawh a awm chho tan a. Hetiang harsatna hunah hian sum hman tur nei tlem theuhvah pawh, Officer leh sawrkar hnathawk, remhria, mahni hna a inpumpek mi leh a nachang hria chuan mipui tan hmasawnna lian tham tak an thawk chhuak thei thin a ni a ti a. Review meeting chhimtu BDO leh RD a thawk Engineer-te chu an hlawh bak sum siam tum lo tur leh an mahni dawrtute pawh hawihhawm taka lo tanpui thin turin a chah a. Sawrkar hnathawk thamna beisei a midang tana harsatna siam thin te chuan transfer leh suspend ringawt hi hremna a ni lo tih hria se, hremna dik tak zawk an service tan pawh a pawi thei sawrkar thu tlukna an hmachhawn thei tih ah erawh chiang zawk se a tha ang a ti a ni. International ramri hrul a BADP hnathawh te chu kum 1 chhunga zawh theih chi vek ruahman a ngai tawh a, hei hian eirukna kawng inhawng thin a khar theih a rinawm a ni tiin BDO leh Engineer te pawh an dawhkan atanga hnathawh zawh finfiahna(work completion report) siam tawh lo turin a hrilh a ni. RD Minister chuan BADP huam chhunga tuikhur leh tui dah khawlna atan te a hman thin RCC water tank te a tlo lo tih finfiah a nih tawh thu a sawi a. Heng hmunah te hian tuizem siam a nih leh pawhin Rangva khawng chi khawr pum hman a ni tawh zawk ang a ti a. Hei hian lirnghing lakah water tank te a venhim bakah tui dahkhawlna khi chat leh pawp te a ti tawp dawn a ni a ti.
BADP review meeting hi Pu V. Lalsangliana, Director, Rural Development Department in a kaihruai a, he hunah hian RD block BADP area a puan bik 16 atangin BDO leh Engineer te bakah RDD hotute an tel a ni. BADP hi Ministry of Home Affairs hnuai a Scheme pakhat International ramri hrula khua awm te tihhmasawnna programme pawimawh tak niin he hmalakna sum hi Central Sawrkar in 100% a rawn tumsak a ni. BADP hian Guidline fel tak neiin BADP huam chhunga khua leh a chhunga cheng te tan BADP tanpuina sum hmang hian khawtlang tana rotling hmalakna hrang hrang – kawng, lei, tuizem, khelmual, damdawi In sak, Community Hall, School Building sak hna leh thil tangkai dang tam tak thawh mek a ni. Report a tarlan dan in kum 2013-2014 chhungin BADP hnuaia RD Block 16 tih hmasawn nan Rs.3,977/- lakhs dawn a ni.
