Vawiin khan SRI hmanga Buh chin, Pi Kaphliri lo, Dihmunzawl-a mi chu Mizoram Ethics Committee member thenkhatte leh Agriculture Department Director, Dr. C. Lalzarliana leh Agriculture Officer dang ten an seng pui. Pi Kaphliri ram, buh chinna zau zawng hi Sq metre 6,000-a zau a ni a, nikum khan SRI hmanga Buh lo ching tawhin Phur 100 ( chu chu tin 300) an thar a, Hectare 1 ( 10,000 Sqm) atangin tin 500 thar ang an ni. SRI dan hmang lo va buh an chin lai chuan phur 50-60 chauh an thar thin. Kumin hian Buh chi 4- KRH-2 (Hybrid), Ashyda, Chinkakhao leh Idaw (Buhban) an ching a, nikum aia thar tam an inbeisei nghe nghe a ni.

Buh senga an feh hma hian Mizoram Ethics Committee member 3 te chuan Agriculture Department Committee Room-ah Agriculture Department Officer-te nen inkawm hona neiin Agriculture Department hmalakna hrang hrang, abikin Buh thar tam tura hma an lak dan te, thingtlang khaw kilkhawr ber thlenga District Officer-te hmalakna an enpui (monitor) dan te, Buh natna leh rannungin a tihchhiat chungchanga Agriculture Scientist-te leh ICAR Scientist te a hmunah kala an endik dan te a lem nen entir a ni a. Heng loneitute harsatna sutkian a nih theihnan leh a hun taka control a nih theih nan ICAR Research Complex, Barapani-ah endik turin thawn a ni tawh nghe nghe a ni. Kumin hian Champhai leh Serchhip District-a leilet hmun engemaw zatah Buh natna chi khat “Buh turh” an tih mai chu a hluar hle a, he natna avang hian heng District pahniha Buh thar pawh nasa taka a tlakhniam phah rin a ni.

Ethics Committee member-te chuan Agriculture Department-in theihtawp chhuaha hma an lakna te chu lawmawm an tiin nasa lehzuala chhunzawm zel tura an beisei thu Agriculture Officer-te chu an hrilh nghal a ni.