Lunglei Polytechnic-a harsatna thleng chungchangah Higher & Technical Education Department chuan hetiang hian thuchhuah a siam :

Tukin zing dar 10 pelh tawhah khan Mizoram Polytechnic Lungei a harsatna thenkhat sorkar-in an duh anga a tih hlawhtlin mai loh avangin class kal tur an dang tih telephone in department in a dawng a.

MZP Lunglei Polytechnic te hian heng a hnuaia thil chi hrang hrangte hi an rawn dil a.

1. Industrial Visit-cum-Study Tour : Hemi atan hian Rs. 7.20 lakhs sorkar-in (Planning) ah a dil sak mek a.

2. Polytechnic hmun Hrangchalkawn ah Internet hmuh a harsat avangin practical class neihna turin Lunglei khawpui chhungah Centre-cum-Outlet neih an rawn dil a. Heta senso tur hi a vaiin Rs. 5 lakhs vel niin proposal duan chhoh mek a ni.

3. Laboratory a khawl chi hrang hrang enkawl nan pawisa an dil chu Rs. 3.60 lakhs dah sak an ni a. Khawl chi hrang hrang repair leh maintenance atan Lumpsum Provision for NER and Sikkim atangin Rs. 2 crores India sorkar-ah dil mek a ni.

4. Hostel Superintendent hmeichhia leh mipa dil niin sorkar-in pakhat min phal sak a. Pakhat fill up na tur hian department in hma a la mek.

5. An building hrim hrim repair na turin tunah hian Lumpsum Provision for NER and Sikkim tih hnuaiah Rs. 24.49 crores India sorkar-ah dil mek a ni a, Chubakah India sorkar-ah vek bus 2 lei nan pawisa dil mek a ni bawk.

6. Girls Hostel sak nan Central sorkar-in Rs. 90 lakhs a rawn pe a. Chuta tang chuan Rs. 80 lakhs hmuh ni tawhin 3rd instalment a mi Rs. 10 lakh pawh dawn a ni tawh.

Hetianga sorkar-in hma a lak mek maia zirlai (MZP) ten harsatna siam zawnga hma an la ta mai hi sorkar chuan pawi a ti hle a. Zirlaite hma ngaia class tha taka kal chhunzawm turin a ngen a ni.