Nimin chawhnu dar 2:00 PM khan Pu H. Rohluna, Environment & Forests Minister chuan Ngopa-a Forest Rest House sak thar chu a hawng. Forest Rest House hawnna inkhawm tawite Rest House tuala buatsaih hi Champhai Divisional Forest Officer (DFO) Pu C. Vanlalena’n a kaihruai a, Technical Report a pe bawk a ni.

Pu H. Rohluna chuan sawrkar thil leh sawrkar hmalakna te hi a neitu rilru pu a, dimdawi a, duat taka enkawl that a pawimawh thu sawiin hemi kawnga mipuiin rilru puitling tak an pu chho mek chu lawmawm a ti a. Forest Rest House chu Ngopa khawtlang, a mamawhtu leh zin veivak ten tangkai taka an hman ngei a beisei thu sawiin duat taka mahni ta anga enkawl turin a chah bawk a. Tunhnaia Environment & Forests Department in hmasawnna ruhrel (infrastructure) hrang hrang an sak tawh te leh an sak mek ah te hian quality tha hmuh tur a awm chu lawmawm tiin hei hian Environment & Forests Department hnuaia Range, Beat leh Division hrang hrangte inkarah a tha zawngin inelna a siam a ni, a ti bawk.

Minister hian Khawvel puma sum leh pai tlakchhiatna (economic recession) hian kan ram India pawh hi a nghawng lo thei lo a, hemi avang hian Sorkar Laipui pawhin sum leh pai renchem nan leh sum inrelbawlna tha zawk a awm theih nan mipui hnena subsidy hrang hrang a pek thin te chu a ennawn a. Gas subsidy pawh ennawn a ni a, kum khata man tlawm a gas cylinder consumer ten an lei theih zat chu a bithlaih ta a ni, a ti. Kumin January leh September thla inkarah khan Sawrkar in man to a buhfai a lei nan Rs. 43.99 crore vel a seng a, hei hi mipui harsa zawk te hnenah man tlawmin (kg khat Rs 9.50) a a hralh leh avang hian sawrkar in sum tam tak hloh a, mahse hei hi mipuite te tana sawrkar inpekna a ni, a ti a ni.

NLUP chungchang sawiin Minister chuan a dawngtu chhungkua ten an dinchhuah pui ngei theih nan theitawpa tan an lak a pawimawh a, rilru pawh an siam ngheh viau a tul a, Sawrkar-in a tum anga kan tihhlawhtin hi kan bat a ni, a ti a. Sawrkar in NLUP dawngten sum an hman dik chu a ngaipawhmawh em em avangin a endikna te pawh a uluk dawn a ni tiin an sum dawn te chu dik taka hmang tur leh taimakna, tumruhna leh rinawmna nena thawk turin mipui kalkhawmte chu a chah a ni.

Ngopa Forest Rest House hi Rs. 15.00 lakhs seng a sak niin, a main building-ah hian pindan pali (mi 8 thlen theihna) a awm a, main building thlangah hian choka a hranpa a sak a ni bawk. Building zau zawng hi square metre 150 vel a ni. Kawlbem leh NE Khawdungsei-ah te hian Forest Rest House a awm tawh a, Mimbung-ah hian sak mek a ni ve thung. Environment & Forests Department hian sawrkar kum 2010 -2011 chhung khan building thar 16 an sa a, kum 2011 – 2012 chhung khan building 10 an sa bawk a ni.

Pu H. Rohluna, Environment & Forests Minister hian vawiinah Teikhang, Hrianghmun leh Mimubung khua te a tlawh dawn a ni.