Nizan khan Art &Culture Minister Pu PC Zoram Sangliana chuan The Association for Theological Education by Extention (TAFTEE) Graduation Programme, Bawngkawn Aizawl-a Mission Foundation Movement kaihhruaia neih chu a hmanpui.

Pu PC Zoram Sangliana chuan Mizoram chhungah ngei TAFTEE rawngbawlna chhawr tangkai ve theih a ni ta chu lawmthu sawiin chak leh zuala hma an lak zel leh Pathian rawngbawl nan pawh rah tha tak a chhuah chhunzawm zel a duhsakna a hlan a. Zosap missionary ten Mizoram leilung an rahna hmasak leh Mizoten mahni ram humhalh nana sap sipaite an beih letna hmun Changsil-a Peace Memorial Park of Freedom Movement din tum mekah sorkar leh Mission Foundation Movement (MFM) ten thawhhona tha tak an neih tur chungchangah lawmthu a sawi bawk.

TAFTEE hi Asian Theological Association hriatpui (recognised) niin Certificate course atangin Doctorate degree thleng Class kal ngai lovin hnathawk lai te pawhin mahni inah lehkhabu te leiin a zir theih a. Karnataka khawpui Bangalore-ah hmunpui neiin an Dean chu Rev. T. Velvet John a ni a. Aizawl-a graduation hmanpui tur hian a lo zin nghe nghe a ni. Aizawlah hian Promotional Executive Rev Vanlalnghakliana hovin kalpui a ni.Tun tumah hian Certificate level course zirchhuak mi 19, Certificate in Theology zirchhuak mi 1 leh Bachelor of Theological Studies zirchhuak mi 3 an awm a ni.

TAFTEE zirchhuak te lawmpuina inkhawm hi Pu F.Malsawma’n a kaihruai a, Upa R.Vanlalzauva’n inlawmna thu a sawi a, Upa Chhunkunga’n malsawm tawngtaiin inkhawm hi a tin a ni.