Ethics Committee buatsaih, ‘Rorelna Dik’ tih thupui hmanga vawiina Vanapa Hall-a Seminar neih chu an mi sawmte leh mipuiin an hlutsak hle a, hall khat tlatin seminar chhimtute an kal a, Chief Minister Pu Lal Thanhawla’n thuchah a sawi.

Chief Minister chuan kan zavaia mamawh, rorelna dik tih thupui hmanga Ethics Committee in seminar an buatsaih chu a phurawm a, a lawmawm hle a ni a ti a. Kum 2008 inthlan dawna mipuite tawngtai hla ber chu kan ramah rorelna tha, rorelna fel leh rorelna dik a awm theihna tur a ni tiin, chu tawngtai chhanna chu an mahni MLA 32 te hi an ni a ti a. Chuvangin rorelna dik a awm theihna turin huaisen takin fello leh diklo te chu an hailang chho mek zel a ni a ti a. An mahni pawh thil tisual ve thei tho an nih avangin, diklohna leh fellohna ten a tihbuai loh nan, an mahni veng tur leh viltu tur atan Ethics Committee chu din a ni a ti a. An sorkar chhung zawnga kaihruaitu atan Bible a chang, Amosa 5 : 24 chu thlan a ni a ti.

Chief Minister chuan a sorkarin thil pathum a ngaihpawimawh bikte sawiin, retheite khaichhuah nan NLUP chu a hmanruaah hman a ni a, thalaite tan khawvel thar siam sak turin, infiamna lamah hma an sawn theihna tur leh zirna sang zawk an neih theihna tura kawng siam sak te leh eirukna, corruption nuaibo te an ni a ti a. Eirukna ringawt hi corruption anih loh thu sawiin, dawngdahna te, thatchhiatnate, kuttling lova sum lak luh tumna te leh zelthelna te hi corruption vek a ni a ti a. Tlemte thawha atam ber lak duhna hian ram ati thuanawp a ni a ti. Ethics Committee hi keini leh sorkar hnathawkte min vengtu leh min khalh ngiltu an ni a, kan thawhhona pawh a tha hle a ni a ti a. NLUP dawngtute hi a venpuitu tur vek kan ni a, Ethics Committe in seminar an buatsaih hi ka phurpui phah hle a ni a ti. Dik lohna leh eiruk dona kawnga PRISM leh SOSA ten min finchhuah thinnaah lawmthu ka sawi bawk a ni a ti.

Chief Minister chuan mi thahnemngai tam tak avangin tha takin sorkar a kal thei a, a lawmawm hle a ni a ti a. Kan work ethics leh kan kalphungah te hian inenchianga, kan hlawh leh kan hnathawh a inphu em tih te, kan sum lakluh leh kan in leh lo, kan khawsakzia te a in phu em tihte kan inen a ngai hle thin a ni a ti a.A chhelai siam tha tura koh vek kan ni a ti. Chief Minister chuan Pathianin mihringte inenkawlna tura hmanrua min pek chu politics hi a ni a ti a. Politics chu midangte tana malsawmna ni tura hmanrua anih avangin, mahni sahmim ham puarna tur a nilo a ni a ti.

Ethics Committee hian district dangahte seminar hi la buatsaih chhoh zel a tum a. Hetah hian Chief Minister chuan sorkar hnathawkte chu neitu chan changa lo kalpui zel turin a chah a ni.

Seminar ah hian Rev.C.Rosiama, Chairman, Ethics Committee (EC) in ‘Rorelna Dik : Bible-ah’ tih paper a present chu chawhma lamah EC member Pu H.Raltawna kaihhruainain sawiho a ni a .Chawhnu lamah EC member tho Rev.Dr.K Thanzauva kaihhruaina hnuaiah Rev. C.Lalsangliana, member EC paper present ‘Rorelna Dik ; Mizoramah’ tih chu sawiho a ni bawk.

Seminar a tel tur hian EC hian MLA zawng zawng, FLAM, Sorkar hnathawk hotu lian, Head of Department, AMC Councillors, Local bodies hruaitute, NGOs zawng zawng leh MJA te an sawm a, kal an thahnem hle a ni.