Kar kalta September ni 8, 2012 (Inrinni) khan Home Minister leh bialtu MLA ni bawk Pu R.Lalzirliana chuan Keifang-ah M/s Mabiaki Indane Gramin Vitrak a hawng a, he gas semna hmun thar hawnnaah hian Supply Minister Pu H.Rohluna chu Khual Zahawm a ni bawk.

Home Minister Pu R. Lalzirliana chuan an bialin malsawmna tam tak an dawng a, chung zingah Keifang leh a chhehvel 10 kms. huamchhung mipuite mamawh phuhruk thei tur LPG semna hmun an nei thar thei hi a vanneihthlak a ni, a ti. He bial atan sorkarin nasa takin hma a la mek a - UD&PA hnuaiah khaw cheithat leh kawngpui siamthat te, Saitual High School tan khum 100 awm theihna Boys & Girls Hostel te, khawtlang tan khelmual leh hall tha sak te leh Sihfa-ah District jail sak te chu mipuite tan tangkai taka hmang thiam turin a chah a ni.

Supply Minister Pu H. Rohluna chuan sorkar laipui hnuaia Rajiv Gandhi Gramin Vitrak Yojana hnuaiah Mizoram hmun 6 - Sangau, Thingfal, Thenzawl, Ngopa, Darlawn leh Chawngte - ah LPG semna hmun hawn a nih tawh thu leh Keifang chu a 7-na a nih thu a sawi a. Ministry of Petroleum leh IOC phalna hmu lehin Kawnpui, W. Phaileng, Khawbung, N.Vanlaiphai leh Kawlkulh-ah te pawh hawn belh zel a ni ang, a ti. Kumin November thlaah hmarchhak bial Supply Minister Conference chu Aizawl-ah Union Minister hovin neih tum a nih thu a sawi bawk a ni.

Gramin Vitrak hnuaia LPG hi a man tlawm zawka zawrh thin a ni a, bur 1 hi Rs.410/- a ni.

Hemi ni vek hian Home Minister Pu R.Lalzirliana leh Supply Minister Pu H.Rohluna ten Saitual-a Supply Godown sakna tur hmun an enfiah nghal a ni.