Mizoram sorkar venpui tura din Ethics Committee leh sorkar mi pawimawh Commissioners, Secretaries, DCs leh Jt. Secretaries chin te chu vawiin khan I&PR Auditorium-a inkhawm buatsaihah an inkawm hova, Chief Minister Pu Lalthanhawla'n he hun hi a hmanpui a ni.

Ethics  Committee Member Pu H.Raltawna kaihhruaiah hian Chief Minister chuan Ethics Committee te chu sorkarah inthlahrung lo tur leh an hnathawhnaah theihtawp chhuaha puih a inhuam thu a hrilh a. Parliament leh State Assembly-ah te Ethics Committee din a nih laiin Mizoram sorkarin kohhran hruaitu leh tlawmngai pawl aiawh atanga Ethics Committee a din erawh chu kawng tinrenga sorkar venpui tura beisei an nih dan a tarlang a. Eirukna, hlemhletna leh thuneihna hmansual zawng zawng laka sorkar chu venpui turin a sawm a ni. Chief Minister chuan Mizote chu sum ngainatnaah kan luh mai a hlauhthawn thu sawiin duhamna chu sual tinreng bul a ni, a ti a. Sorkar thuneihtu sang zingah hlemhle leh kuttling lova sum lak a awm loh nan theihtawpa tanpuiah Ethics Committee te a ngen a. Ram leilung fate damkhawchhuahna tur leh Mizo nunphung hrim hrim kawng dika hruai turin mipuiin Ethics Committee ah beiseina sang tak an nghat dawn a ni, a ti. Pu Lal Thanhawla chuan sorkarna an din tan tirha an inhlanna sawichhuakin kawng engkima lepse ngam nih an tum dan leh chu chu sorkar hnathawk a te ber atanga a lian ber pawhin ngam ve se a duh thu a sawi a. Sorkar hnathawkte chu sorkar neitu leh mipui thlan lalte inthlak kar pawha awm reng an nih avangin rinawm taka hna thawk tura beisei an ni, a ti.

Chief Secretary Pu Vanhela Pachuau pawhin tunlai khawvela rorelna tha ber democracy hnuaiah a hnathawktu bureaucracy te mawhphurhna sanzia tarlangin sorkar kalphungah engkim belhchian dawl leh lang tlang a pawimawh tak zet a ni, a ti.

Vawiin inkhawmah hian Ethics Committee Secretary Major Dr. J.Thanruma'n Report a pe a. Ethics Committee Chairman Rev. C. Rosiama'n he Committee kalphung dan tur leh an hmalakna tur te a sawi.

Sorkar mi pawimawh lam atanga rawtna leh thurawn engemawzat sawiho a ni bawk a, inkawmhona chhimtu an kal tha hle.