Vawiin chawhnu dar 1 khan Ethics Committee te chuan an Chairman Pu H.Raltawna, hovin Chief Minister Pu Lal Thanhawla an hmu a, an hnathawh dan tur kalphung (Terms of Reference) an neih tawh thu te hrilhin ram hruaitute tana  tawngkam mawi hman a pawimawh an tih thu te an sawipui a, Chief Minister chuan lawm taka lo dawngsawngin thurawn tha pe zel thin tur leh finchhuah zel turin a lo sawm a ni. Chief Minister chuan hmasawnna (development) awm tak tak tur chuan hlemhletna kan ven tlat pawimawh a tih thu te sawiin chumi kawnga tan lakpuiah a sawm a, mipui lam pawhin hlim taka kan khawsak ho nan vantlang mawhphurhna (civic sense) kan neih that a pawimawh thu te a lo sawipui bawk. Ethics Committee member te chuan sorkar department hrang hrang te chuan an hmalakna report chhuah thin se la, chu chu Chief Secretary-in certify thin se thaa an hriat thu te Chief Minister hnenah chuan an thlen a, mipuiin tlang taka sorkar hmalakna chungchang leh thil dangte an hriat theih nan department changtu Minister leh Officer lian te kawm an tum thu te an hrilh bawk.

Ethics Committee hi Mizoram Sorkar inrelbawlna leh hnathawh dan phung, dik leh felfai taka kalpui a nih theih nana sorkar venpuia thurawn pe thin tura din a ni a, vawiina Chief Minister an kawmna ah hian Ethics Committee Member Pu K.Sapdanga, Rev.C.Rosiama, Rev.C.Lalsangliana, Rev. Lalrinsanga, leh Pi Lalbiakengi te an kal a,  Maj.J.Thanruma leh Pu Lalbiakzuala te erawh rokhawlhna avangin an lo tel thei lo a ni.