Vawiin khan Chief Minister’s Office Conference Room-ah Ethics Committee chuan meeting neiin, an hmalaknate hetiang hian an tarlang.
Ethics Committee term hnihna chuan thlaruk a lo tling ta a, chumi chhung chuan vawi 10 Committee neih a ni a, chu baka hmalaknate chu hengte hi a ni:
1.June 13, 2011 (Monday) 2 :00 p.m.-ah Secretariat Conference Hall -ah Minister te, Parliamentary Secretary te, M.L.A te leh Mizoram M.P te Ethics Committee-ten kawmin kan hnathawh tum dan kan inhrilhfiah a. M.L.A 30 leh M.P 1 an lo kal a, kan inkawmna boruak a tha hle.
2.June 27, 2011 (Monday) 1 : 00 p.m.-ah sawrkar hotu lian Joint Secretary level chin chunglam te, Department Head te MPSC, MSIC, MBSE leh Corporation hotute chu I & PR Auditorium-ah ko khawmin kan hnathawh dan turte kan hrilhfiah a. C.M leh Chief Secretary-in min hova, kan thawh that theih duhin thu tha tak tak an sawi bawk.
3.Chief Minister hnena lawmthu sawi:
(1) A sawrkar khalh ngil a, thurawn petu Ethics Committee a din ngam hi fak phu kan ti a. MLA-te leh High Official-te hnenah Ethics Committee a ngaih pawimawhna chungchang a sawi dan te, Opposition-te lakah pawh Pa nih tling tak leh inhawng taka a thusawite kha tha kan tih thu kan hrilh.
(2) Sawrkar dik leh thianghlim siam tura theihtawp a chhuahna leh sual dona kawnga an hmalaknate hi fakawm kan tih thu kan sawi.
(3) Ram venhimna kawnga sawrkar hmalakna chu fakawm kan ti a. Police-ten pawisawi lo rukbo an chhan chhuahna te, misual mi in rawka pawisawi lo that a, an neih rawktu an man chhuahna te, tun hnaia hnamdangten Mizo nula-te bum a, nawhchizawrhna hmuna an dah (human trafficking), an chhan chhuahnate chu fak tlak kan tih thu kan sawi bawk.
(4) Chief Minister-in Kohhranho (MKHC) hmalakna a ngaih pawimawh avanga Remna Ni hlawhtling taka hman lo ni ta kha lawmawm kan ti a. Tin, Mission School harsatna chung changa kohhranho ngenna a ngaih pawimawhnate chu lawmawm kan tih thute kan sawi.
4. Sorkar-a thu thlen thenkhatte:
(1) MLA leh High Official-te hmaa Chief Minister thusawi thenkhat - Department pawisa tham ching chungchang te, Case chhuinaa doctor, magistrate leh a chhuitu ngeite pawh rinawm tawk lo an awm thei anga lang te, office file kal vel muang lutuk anga langahte hian Ethics Committee chu eng ang tluka lo inrawlh ve turah nge min beisei tihte kan zawt a. Ani chuan sorkar siam thatna tur a nih dawn phawt chuan inthlahrung hauh lova inrawlh zel tura min duh thu min hrilh.
(2) Kan Chief Minister zahawm takin vantlang hmaa a tawngkam chhuakah Political Party pakhat President mai ni lova, Ram pumpui Pa chan chang, Chief Minister a nih avanga uluk leh fimkhur lehzuala tawngkam a hman kan duh thute kan sawipui a, tha takin min lo dawngsawng thin a, kan lawm hle.
(3) PHE Department hnuaia Project lian tak tak Greater Water Supply Scheme- Saitual, Lawngtlai leh Tuipanga chungchangah – heng project te hi a hlawhtling lo mai ang tih hlauhthawnna a awm avangin Ethics Committee chuan a chhuiin a zir chiang a. Thil fel lo awm theite leh he project tithuanawp theite Chief Minister hnenah thlen a ni a. Ani chuan lo enzuia hlawhtling ngei tura hma lak a nih tur thu min hrilh a ni.
(4) Food & Civil Supply Department hnuaia buhfai lei leh hralh chungchang thuah sum tam tak cheng nuaih 1010 chuang thla tin hloh a nih laia buhfai kan in daih chuang lo va, kan tam reng si hi Ethics Committee chuan ngun takin a zir chiang a. Family Ration Card System uluk zawka ennawn te, VIP ten Quota an nei tam lutuk leh Special Permit an pe tam lutukte hi ennawn a, sorkar-in mithiam ruaiin, chhui chianga kalphung tha zawk duang chhuak turtein rawtna thlen a ni.
(5) Tun hnaia PWD leh Finance Department sawrkar sum kal hmang chung changa vantlang hriata an inpuh tawn kha mawi lo kan tiin tha lo kan ti hle mai a, kan sawipui bawk.
(6) Mizoram Government Adhoc Aided School Teachers’ Association (MIGASTU) hotuten an harsatna chu sawrkarah sawipui turin min ngen a. Anmahniin duh tawka an sawi theih nan sawrkar hotute an thu lo ngaihthlaksak turin CM hnenah August 28, 2011 khan ziakin kan ngen.
(7) Mizoram sawrkar sum indaihloh avanga mi tam takin harsatna an tawh laiin hotu lian lam facilities dawn tam tak – Sorkar hotu lianten an hlawh pang ngai baka M.R. ruai anga a pawisaa hnathawktute hlawh an dawn tel thin te, sorkar-in motor an dawn tur a bituk aia tam an kawl te leh mainatenance atana senso tam lutuk te, Food & Civil Supplies Dept. in VIP Quota pek an ngah lutuk ang chite leh sorkar hmalakna thenkhat a hnathawhna tak aia a behbawma a intuituahna senso (establishment cost) sang lutuk ang chite hi uluk zawka enfiah a siamtha turin sawipui a ni.
(8) Sawrkar hotu liante hna pawimawh leh mawhphurhna lian tak tak chelh kawp an awm thin a. Hei hi kawng thenkhatah chuan sum renchem nan leh hna chak zawk nan a tulna awm bawk mah se, induhsak bikna te leh hna thuanawp zawkna a nih theih bawk avangin a theih anga ennawn turin sorkarah thlen a ni bawk.
(9) Assam Rifles ram chhuahsan tura mimal hmun - ram nei mi 62 te kum 2002-a Assembly-in a khapna dan a siam te, Dec. 19, 2002-a The Mizoram Gazette-a chhuah tawh tun thlenga bawhzui fumfe lohva la awm chung changah CM, Speaker leh Revenue Secretary leh hotu dangte sawipui a ni.
(10) Thihna rapthlak pui pui thleng thin leh mihring taksa peng ringawt chhar ang chi-ah te leh law and order chungchangah te sorkarin chak leh zuala hma la turin sorkar thuneitute sawipui a ni.
(11) Corruption venna, Lok Ayukta din chungchangte pawh Ethics Committee chuan thlir hovin, sorkar lama hriatna neite pawh rawnin a zir mek a ni.
(12) Tun hnaia “Tual leh Ral thah” chungchang thua Political Party-te inchirhthehna chungchangah Party hotu pawimawhte len chilhin, a inep zawnga thil ti zui tawh lo turin kan ngen a; min lo dawng sawng tha hlawm hle a, kan ngenna pawh tihhlawhtlin an tum tih min lo tiam hlawm avangin an chungah kan lawm em em a ni.
(13) M.L.A leh Sawrkar hnathawk mimal nungchang te pawh kan thlithlaiin kan zir a, a tul anga la en chhoh zel kan tum. Hemi chungchang hi Chief Minister nen pawh sawiho tawh a ni a. Fel lo deuh an awm chuan len chilh kan tum a, a tha leh a fel deuhte pawh lawmthu hrilh a, mite hriat tur pawha pho lante kan tum bawk.
