Ethics Committee chuan vawiin khan Chief Minister Office’s Conference Room-ah thukhawmin tunhnaia Education Departmenta SSA sum lapse leh lapse loh chungchanga ram hruaitute thu inchuh mekin nghawng thalo a neih theih dante ngun takin an sawiho.

Committee-ah hian hetianga firfiak taka inbeih hi Ethics Committee chuan pawi a tih thu an sawi a. He inbeihna hian thil thalo zawk a hring chhuak thei dawna hriain, kohhran hotute leh mipui vantlang lam thil chinchang hre phak chuan ngaihdan tawk an neih thiam tho avangin, kan ram rorel khawl leh roreltute zahawmna humhim nan hetianga inbeih hi tawp tawh se an duh tih an tarlang a. Ethics Committee duhdanah chuan House Inquiry din tawh pawh hi thiat leh mai se tha an tih thu an sawi bawk a. Mimal leh Political Partyte pawhin hetianga inbeihna lam hi bansan tawh nise an ti a. Hemi tihlawhtling tur hian thuneitute, political partyte leh media lam ten theih tawpa tang tlang turin Ethics Committee chuan a ngen a ni tih an tarlang a ni.