Vawiin khan Mizoram Engineering Service Association chuan Aijal Club-ah General Conference vawi 32-na an nei a. Conference hmanpuitu Parliamentary Secretary Pu Lal Thanzara chuan ram kalsiamah thluak bur, kut leh ke ber engineer rualte hian mawhphurhna sang tak an nei a ni, a ti. MESA Conference hawnna inkhawm hi an President Er. K. Lalsawmvela’n a kaihruai a, kum kalta chhunga an member boral ta Er. R. Lalhlira sunna hun leh MESA member thar 20 lawmluhna hun an hmang a ni.

Parliamentary Secretary to CM Pu Lal Thanzara chuan ram leh hnam tungding tak tak tur chuan “ramhlui zia” bansan ngam theuh a ngai a, sorkar hmalakna leh mipui mamawh a phuhruk kawng hrang hrangah hian phunnawi aiin infak thiam a tangkai fo zawk a ni, a ti. Sorkar hmalakna pui ber NLUP kalpui mekah hian engineer hote chu a kaihnawih department changtu ni ve khar lo mahse mipui mamawh zual- kawngpui, kawlphetha leh tui - khawihtu an nih avangin a hlawhtlinna pawh an ko ah thui tak a innghat tih hre reng turin a chah a. State chhunga kawngpui duhthusam lo anga sawi thinte pawh sum harsa chung chungin engineer-te inpekna nen tunah chuan chak taka chei bawl an ni tawh a. Kawlphetha hniarhnang zawk neih theihna tur pawhin tunah hian Tuivai leh hydel project engemawzat chu sorkar laipui bultuma thawh thei thuai beisei an ni tawh bawk, a ti a. Kolasib, Champhai leh Aizawl District chhunga Minor Irrigation hna thawh tum mekte pawh sorkar laipui duhdan ang thlapa thawh a nih theih nan tunah hian Tender koh a nih mek thu Pu Lal Thanzara chuan a sawilang bawk.

Vawiinah hian an pawl inkaihhruaina chungchang thu te, zau zawka an inzarpharh theihna tur kawng leh mawhphurhna sang zawk an chelh ve dan tur kawng agenda pawimawh tak tak an ngaihtuah ho a ni. An Association Patron member, a hna atanga chawl ta, E-inChief hlui Er. Liansanga leh SE, P&ED hlui Er. P.N. Pandey te hnenah ngaihhruina thuziak MESA President chuan a hlan a ni.