AMFU General Hqrs. leh Eurovanille India ten thawh hona thuthlung an lo ziah tawh bawh zuina chikhat atan vawiin khan Eurovanille India hotute Pu Nicolas, Chief of Production Eurovanille leh Ms. Mathilde Baudean, Production Manager Eurovanille India te chuan Lunglei tlawhin Lunglei Bawrhsap Pi Lalzarmawii IAS kawmna an nei. Eurovanille hotute hi AMFU President Pu Joseph H Thanzuala leh General Secretary Pu Zion Lalremruata ten an tawiawm a, Lunglei DC Pi Lalzarmawii chuan Vanilla chin chung changa AMFU leh Eurovanille India ten thawh hona thuthlung an siam chu lawmawm a tih thu sawiin thlai changkang leh hralhna a harsatna awm lo tur Lungleia District chhunga kuthnathawktute tana chhawp chhuah a ni chu kuthnathawktute tan malsawmna a ni tiin Lunglei District sik leh sa leh boruakin a zir bawk si avangin thahnem ngai taka thawka hlawhtlinna hmu ngei turin kuthnathawktute thawhpui turin a chah a ni.

Hemi hnu hian AMFU Dist, Hqrs. hruaitute kaihhruaina hnuaiah Lungleia Media-te leh Urovenille hotute hian Hrangchalkawn leh Thaizawl rama Vanilla chinna tur hmun hma AMFU ten an lo ruahman chu an en hova, Eastern Rural Institude & Research Centre, Hrangchalkawnah Vanilla ching tura thlan kuthnathawktute nen hun an hmang ho a ni. He hunah hian Dr. K. Lalmuanzovi, Senior Scientist & Head, KVK Lunglei leh a thawhpui ten Vanilla chin dan tha leh a kal hmang bakah a enkawl dan kuthnathawktu kalkhawmte an zirtir a. Thlai vang leh man man taka hralh theih a nih dan leh Chocolate, Perfume leh Ice Cream siamna hmanrua pawimawh tak a nih bakah duh khawp lei tur khawvel hmun hrang hrangah a la awm loh dan te sawiin kuthnathawktuten thahnem ngaitak leh taima taka an beih chuan din chhuahna hmanraw pawimawh tak a nih dan te an sawi a ni.