Sports Minister Pu Zodintluanga hovin Mizo hmeichhe zinga Mt.Everest lawnchhuak hmasa ber Lalrintluangi lawmna inkhawm chu nimin khan Aizawl Vanapa Hall-ah neih a ni.
Pu Zodintluanga chuan Lalrintluangi lawmpuiin khawvela tlang sang ber lawnchhuak tura a tumruhna leh tawrhchhelna a fak a, thalaite tana entawntlak, mi chhuanawm a ni, a ti. Mizo history a chuang reng tawh tur Lalrintluangi hlawhtlinna chu tawrhna leh harsatna tam tak a paltlang hnuah Pathian ring chunga a hlawh chhuah a ni tiin Minister chuan a tumruhna, tawrhchhelna leh huaisenna chu thalaiten vawng tlat se a duh thu a sawi a. Mizo thalaite fuihin eng line-ah pawh kal se lehkha zir a ni emaw, infiamna a ni emaw, Lalrintluangi anga Pathian ring chunga huaisen taka an beih chuan an hlawhtling ngei ang, a ti.
Lalrintluangi hi Lalbiaknipuia leh B.Zirthangi te fanu niin Dawrpui Vengtharah an cheng a, Govt. K.M. Higher Secondary School ah pawl 12 a zir mek a ni. Kum 2014 ah NCC zawmin Sergeant a ni a. Nimin amah lawmna inkhawmah khan Sergeant atangin Under Officer ah kaisantir a ni. Mt. Everest lawn tur hian NCC girls everest expedition hmasa ber a tel tura thlan a ni a. Tlang lawn tur team-a tel tur hian enchhinna tam tak a paltlang a ni. Minister of State for Defence Rao Inderjit Singh chuan March ni 9, 2016 khan National Cadet Corps (NCC) Girls Expedition to Mt Everest te chu vai liamin Everest base camp chu April 21 ah an thleng a. NCC Cadet thlanchhuah 40 ten April-May, 2015 khan Himachal Pradesh a Mt Deo-Tibba (19688 ft) an lawnchhuah hnuah a titha zual mi 15 thlang chhuakin August, 2015-ah Mt Trishul (23360 ft) an lawn chhuak leh a. An zinga panga an chhawk leh hnuah Mt.Everest lawn tur NCC Cadet thlanchhuah mi 10 zinga 9 te chuan May 21 leh 22 khan khawvela tlangsang ber hi an lawn chhuak ta a ni.
Lalrintluangi hi nimin khan Lengpui Airport-ah ropui taka hmuah a nih hnuah Vanapa Hall-a amah lawmna inkhawm hi Sports & Youth Services Secretary Pu H.L.Rochungnunga’n a kaihruai a. Sports & Youth Services Director Pu Zothanmawia leh 1 Mizo Bn. NCC CO Lt.Col. Raj Gargey ten lawmpuina thu an sawi a. Thil pek thahnem tak pek niin Sports Minister hian incentive cash award cheng nuai 5 a hlan a ni.
