Vawiin chawhnu khan UD&PA Minister Pu Zodintluanga Office ah sawrkar hnena athlawn a ram petu Ex-Minister Pu P.Lalbiaka, Ex-Minister leh UD&PA Department Secretary Pu R.Lalvena ten ram inhlanna a inremsiamna hrang hrang an buatsaihte an ziak fel.
Pu P. Lalbiaka'n ama mimal ram sawrkar hnena a hlan tak, Serkawn Melte ramchhunga awm, 0.83 hectares a zau ah hian FIFA Standard ang thlap: khelmual, intlansiakna tur lane 8, galleries leh thilpawimawh dang awmna tur Sports Stadium sak a ni dawn a. He Stadium sakna tur Rs.2418.09 Lakhs hi UD&PA Department chuan Ministry Of Urban Development atanga dawng tawh in NBCC in Stadium sak hna hi a thawk dawn a ni. Ram petu leh Sawrkar inremsiamna ah ziahlan angin he stadium hi ram petu Pu P. Lalbiaka pa Pu Selthuama(L), Pu Lena tia koh thin hmingchawiin 'Lena Sports Stadium' tih a ni anga, a panna kawng Melte road ni thin Khawiva Road tia sawi bawk chu Selthuama Road ti a thlak a ni anga. Stadium leh Kawng hming thar hi sawrkar leh thuneitu dangte tan thlak a rem tawh dawnlo a ni. Lena Sports Stadium sakna tur hmunhma laihna leivungin a hnawh pin kalkawng pawh siam that tum a ni bawk.
Ram inhlan chhawnna programme buatsaih ah hian UD&PA Minister Pu Zodintluanga chuan thusawiin mi tam takin sum hmuh beiseiin an ram neih te sawrkar hnena an zawrh thin lai a Pu P. Lalbiaka, Ex-Minister in Sawrkar hnen ah athlawna ram a pe hi a ropui tak zet a ni a ti a. Ram petu hian hmathlir thui tak neiin thangtharte hmakhua a ngai hle a ni tih a lang chiang a, a inpekna hi Sawrkar leh Zoram mipui tan chuan a lawmawm tak zet a ni a ti. Minister chuan Lena Sports Stadium sakna tur sum hi Ministry Of Urban Development hnuaia scheme pakhat,10% Lumpsum grants for North East Region Development Scheme atanga Sawrkarin a hmuh a nih thu a tarlang a ni.
Ram inhlan chhawnna programme ah hian Pu Lena(L) fapa upa zawk Pu P. Rohmingthanga, Mizoram Chief Secretary lo ni tawh thin chuan chhungkaw aiawha thu sawiin Pu Lena(L) chu infiammi, inbuan chak, tuihleuh thiam tak leh Hockey khel thin a nih thu tarlangin ama hmingchawia Stadium sak chu thil remchang tak a ni a ti.
