Pu Lal Thanzara, Minister of State, Information & Public Relations Department chuan vawiin khan I&PR Auditorium-a C. Hmingthangvunga film siam Khuanu Samsuih chu a tlangzarh.

Pu Lal Thanzara chuan kum 20 chhung rambuai kan nih avangin hmasawnna kawngah Mizoram kan hnufual a, tunah hian sorkarin theihtawp a chhuah a, film lamah phei chuan nikum hmasa atang chauhin pawisa beitham tak dah a ni a, hemi pawisa hmang hian I&PR Department-in daihzai takin film lam hmasawnna atan kawng hrang hrangin hma an la ani a ti a. NLUP hnuaiah film siam hi eizawnna atan dah theih dan a awm em tih ngaihtuahna hman a tum thu sawiin Entertainment Tax chungchangah pawh sorkar dan chu sorkar dan a ni a, mahse, film siamtute tan phurrit a nih loh dan tur ngaihtuah pui a tum thu a sawi. Minister chuan Mizoramah Music Industry tihhmasawn nan hian hma lak mek a nih thu a sawi bawk.

Pu Jim K.Chozah, Director, Information & Public Relations pawhin thu sawiin MFDS din hnu-a sorkar anga hmalak tawhna hrang hrang te leh hmachhawp mek te a sawi.

Khuanu Samsuih film hi cheng nuai 5 chuang senga siam niin thla sarih vel chhunga buatsaih a ni. He film hi Aizawl veng hrang hrang 21-ah chhuah tura ruahman fel a ni tawh.