Vawiin khan Lunglei High Powered Committee sum Cheng Nuai 45.5 senga sak District Agriculture Quarter, Lunglei chu HPC Vice-Chairman Pu S.Laldingliana'n a hawng.

Agriculture Conference Hall-a Quarter thar lawmna inkhawm neih, Agriculture Director Dr.C.Lalzarliana kaihhruaiah, HPC Vice-Chairman Pu S.Laldingliana chuan Agriculture Deparment-a thawkte thawhrimna leh taimakna a fak a, Lunglei District hmasawnna an hawlh kal hle a, a tul huanah field-ah kalin loneitute training an pe a, an inpekna a ropui a ni, a ti. Lunglei District chhunga Department tlabal tam tak an awm a, HPC kaltlangin office leh quarter sak sak a ni dawn tih a sawi a; Department harsatna neite chuan inthlahrung hauh lovin HPC hnenah hrilhhre turin a chah a ni. Lunglei District hmasawn nan sorkar Department hrang hrangte leh HPC inkarah thawhhona tha tak awm a pawimawh a ni, a ti.

Khual Zahawm Lunglei DC Pu Ashish Madhaorao More, IAS pawhin thu sawiin Lunglei District-in High Powered Committee a nei chu vanneihthlak hle a, District-ah hmasawnna tam tak hmuh tur a awm phah a ni, a ti. Agriculture Department hnuaiah scheme tha tak tak kalpui mek chuan hmasawnna a thlen ngei turin duhsakna a hlan a. Office leh Quarter tha neih hian Department hming a ti tha piah lamah a thawkte pawh a ti phurin hna pawh an thawk chak zawk phah thin a ni, a ti.

Lunglei SDAO Pu Ngurrinsanga Sailo hnena atangin Technical Report ngaihthlaka a ni a. Report-a tarlan danah chuan kum 2011-12 chhungin DAO Quarter sakna tur HPC atangin sum Cheng Nuai 15 hmuh phawt a ni a; kum 2012-2013 ah Cheng Nuai 17.5 leh kum 2013-2014 atan Cheng Nuai 12 hmuh lehin a vaiin Cheng Nuai 45.5 sen a ni. DAO Quarter thar hi a hmun zau zawng chu 223 sq.m. a ni.