No.3471/2021-2022

Aizawl, the 20th December 2021 : Excise & Narcotics enkawltu Minister Dr. K. Beichhua chuan National Fund for Control of Drug Abuse (NFCDA) ruahmanna hnuaia Excise & Narcotics Department in sikul leh college zirlai te tana Sap tawnga, ruihhlo do hawi zawnga poetry in ziahsiakna an buatsaih chu vawiin khan lawmman semna hun, Excise & Narcotics Pisapui, Conference Hall ah a hmanpui.

Dr. K. Beichhua chuan ruihhlo hmansualna chungchangah Mizoram chu a san filawr thu te, he thil in Mizoramah bu a khuar thuk tawh thu te sawiin ruihhlo hi thalai nun suattu, ram hmelma a ni tih hi kan hriatnawn a ngai a, huat nachang kan hriat thar leh a tul a, nasa leh zawka mimal, pawl, Kohhran leh Sawrkarin theihtawp kan chhuah tlan a kan do nasat a tul a ni, a ti. Ruihhlo dona kawngah fihlim thei ka awm em tih chu ngaihtuah tham a nih thu sawiin he thilah hian tumah kan bang thei lova, kan hriat loh laiin a salah kan naute, kan fate an tang a, nu leh paten an lo hriatchhuah meuh chuan a lo tlai tawh thin a, Department ang chauh chuan do hneh theih a ni lova, rilru leh tih tak zetna nen kan zavaiin kan tan tlan a theihtawp kan chhuah a kan do a tul a ni, a ti.

Minister chuan thil sual dona kawngah do dan kawng chikhat chauh hmanin hneh takin do a har thin a, chuvangin a dona kawng hrang hrang te duan a pawimawh a, hengah te hian Department finchhuahpui turin mipuite ka sawm duh cheu a ni, a ti a. Vawiina thu inziaksiakna pawh hi chutiang kawng dang chikhat nia a ngaih thu sawiin zirlai naupang heti zat an tel hian ruihhlo an vei zia a tilang a, heng zirlai duhawm tak tak te hi ruihhlo dona kawngah Ambassador ni turin ka sawm cheu a ni, a ti bawk.

Lawmman semna hun hi Pu Z. Lalhmangaihna, Joint Commissioner leh Chairman, Working Committee on NFCDA Project ni bawk chuan kaihruaiin Pu Peter Zohmingthanga, Asst. Commissioner leh Project Co-ordinator, NFCDA ni bawk in he project hnuaia ruihhlo dona kawnga Department in hma an lak dan, hmachhawp an tintuah te leh pawl an thawhpuite a sawi a. Pu Ngurchungnunga, Commissioner chuan he intihsiaknaa lawmman latute hming puangin, endiktute zing atangin Prof. Margaret L. Pachuau’n endiknaa tehfung an hman te leh thuziah an endikte sawizauna hun a nei.

Poetry inziahsiakna hi chi hnih a then niin Category I ah Pawl 9 atanga Pawl 12 zirlai naupangte telin naupang 94 an tel a Category II ah hian college leh university naupangte an telin zirlai 157 an tel a. Mizoram bakah Mizoram pawma Mizo zirlai naupangte pawhin an thuziah te an thehlut a ni.

Category I ah lawmman 1-na chu T. Vanlalchuangkima, Nazareth Higher Secondary School, Aizawl chuan la in sumfai cheng 30,000 a dawng a. 2-na chu Rody Zotluangpuii St. Paul’s Higher Secondary School chu niin sumfai cheng 20,000 a dawng a. 3-na chu Ruth Lalthanpuii, Gurukul Grammar Senior Secondary School niin lawmman sumfai cheng 10000 a dawnga a. Naupang 10 in Consolation Prize an dawng bawk a ni.

Category II ah lawmman 1-na chu Remali Ruth Blessy, Pachhunga University College chuan la in sumfai cheng 50,000 a dawng a. 2-na chu Lalmalsawma, Govt. Champhai College chu niin sumfai cheng 30,000 a dawng a. 3-na chu Jason L. Khiangte, PUC niin lawmman sumfai cheng 20000 a dawnga a. Zirlai 10 dangin in Consolation Prize an dawng bawk a ni.

Ministry of Finance (Department of Revenue) Narcotic Control Bureau kaltlangin ruihhlo dona kawngah awareness programme leh a kaihhnawih atana National Fund for Control of Drug Abuse tanpuina hi Mizoramin a dawn vawikhatna a ni.