No.3472/2021-2022

Aizawl, the 20th December 2021 : Vawiin khan Land Revenue & Settlement (LR&S) Minister Pu Lalruatkima hovin a pisaah Land Revenue & Settlement Board Vice Chairman Pu Rochhunga Ralte leh Department officer te an thukhawm a. Mizoram Sawrkar flagship programme Socio-Economic Development Programme (SEDP) hnuaia hmalakna tur action plan an thlir ho.

SEDP 2021-2022 hnuaiah LR&S chuan cheng nuai 52.81 senna tur ruahmanna ‘Survey and Re-Survey of land for allotment, regularisation of unregistered land holding and updating of survey and settlement record of Saitual District’ tih an buatsaih a. Thla 4 chhunga thawh zawh tura ruahman niin Saitual Town chhung, Keifang, Rulchawm, Ruallung leh Sihfa ah te hmalak tum a ni. He project hi sawrkar chuan pawmpui tawhin survey leh re-survey uluk leh chipchiar taka kalpui a ni dawn a. Land record mumal taka siam fel leh vawn a ni ang. Saitual District a survey leh re-survey neih zawh a nih hnuah Khawzawl leh Hnahthial District-ah te hmalak chhunzawm tum a nih thu meeting-ah hian sawi lan a ni.

Vawiin meeting ah hian Sawrkarin house pass a pawmpui tawh a neituten an lam loh tam tak awm mek chungchang sawiho a ni a. Section 128 and 129 of the Mizoram (Land Revenue) Act,2013 tlawhchhanin LR&S chuan hemi kaihhnawihah hian hriattirna a lo tichhuak tawh a. Land Record vawngtu Revenue Officer chuan 18.11.2019 hmalam zawnga ram allot tawh te chu sawrkarin a pawmpuina ziakin lehkha emaw electronic emaw chanchinbu hmangin a hriattir anga. Engemaw harsatna bik nei, pass lam thei lo te chuan lehkha pek chhuah (issue) a nih atanga ni 90 chhung hian an lam theih loh chhan Revenue Officer an hriattir ngei tur a ni. Revenue Officer in an harsatna a zirchian hnuah a pawmpui a nih chuan hun tiam a pawhsei sak a nga. Huntiam chhung leh pawhsei sak hun chhung pawha an lam lo a nih chuan dan tlawhchhana phalna (allotment) hnuhlet a nih theih nan Revenue Officer hian hma a la ang.

Vawiin meeting-ah hian District hrang hranga LR&S office ruhrel chei that chungchang te, staff indaihlohna chungchang te pawh sawi lan niin, sawrkar sum dinhmun thlir chunga a chinfel dan ngaihtuah ni se, tiin an rel bawk a ni.

Attachment

  • Loading attachment...