3486/2024-2025

Champhai, 12th December, 2024: Vawiin chawhma dar 10:00 khan Excise Minister Pu Lalnghinglova Hmar kaihhruaiin  Ruihhlo Do Meeting chu DC Conference Hall, Keifangtlangah neih a ni a. He hunah hian Champhai North bialtu MLA Er. H. Ginzalala, KVI Board Chairman Pu Lalremliana, Excise & Narcotics Secretary Pu Lalramsanga Sailo, Bawrhsap Pu VL Remliana, SP Pu Shivendu Bhushan, sawrkar official-te, Village Council, tlawmngai pawl leh kohhran hruaitute an tel a ni.

Ruihhlo Do Meeting-ah hian Pu Lalnghinglova Hmar chuan Ruihhlo do dan tur hrilh turin Champhaiah an rawn kal lo tih sawiin, “Champhai a ruihhlo do dan tur chu Champhai mi ten in hre zawk a, in ngaihdan leh rawtna te ngaithla a, thawhhona ṭha zawk a awm theih dan tur sawiho turin kan lo kal a ni,” a ti. Excise Minister chuan Mizoram sawrkar chu mipui sawrkar anih angin ruihhlo do kawngah pawh mipuiin sawi nei ve se an duh thu a sawi a, sawiselna pawh an pawm vek tih a sawi bawk.

Excise Minister hian ruihhlo dona kawngah Mizoram sawrkar chuan theihtawp chhuah a inhuam a, amaherawhchu sawrkar tha ringawt chu a tawk lo tih a sawi a. He mi kawngah hian sawrkar, khawtlang, tlawmngai pawl leh kohhran  te thawhhona a ngai a ni, a ti. Pu Lalnghinglova Hmar chuan ruihhlo ṭhat loh zia inzirtirna chu nasa leh zual zawkin zirna in leh kohhran ṭhalai in hmuhkhawmnaah te sawi a ṭul a ni, a ti bawk.

Champhai North bialtu MLA Er. H. Ginzalala chuan ruihhlo chu mi zawng zawng harsatna thlentu, kil tin aṭanga do ngai a ni, a ti a. A dona kawngah ṭhuang hnih a kal a ngai tih sawiin - ruihhlo zuar leh ngawlvei te enkawl chu tun dinhmunah ngaihpawimawh hmasak ni se; hun rei zawk atan erawh hmathlir thui tak neiin a ti lo te zirtirna ṭha pek te, ṭhalaite eizawnna thar siam sak te a ṭul a ni, a ti.

Mizoram KVI Board Chairman Pu Lalremliana chuan ruihhlo ngai te enkawlna kawngah hmasawnna neih a ngai tih sawiin,  kalphung felfai tak hnuaiah a enkawltute pawh zirtirna ṭha pek an ngai a ni, a ti.

He hunah hian Joint VC hruaitute, Sub Hqrs YMA hruaitute, Kohhran hruaitute leh sawrkar official ten ruihhlo do kawnga hma an lakna te leh an ngaihpawimawh te an sawi a. Pu Peter Zohmingthanga, Jt. Commissioner, Excise & Narcotics Department chuan Narcotic Drugs and Psychotropic Substances (NDPS) Act sawifiahna hun a hmang a ni.