3485/2024-2025

Aizawl, the 11th December, 2024: Mizoram Governor Dr. Hari Babu Kambhampati chuan vawiin khan Mizoram Consumers' Union (MCU) Annual General Meeting vawi 27-na, Synod Conference Centre, Sikulpuikawn, Aizawla neih chu Khuallian niin a hmanpui. He hunah hian Pi Saizikpuii, Director, Food, Civil Supplies & Consumer Affairs Department chu Khualzahawm a ni.

Khuallian Larsap Dr. Hari Babu Kambhampati chuan kum 1995 a din MCU chu Consumer Protection Act, 2019 kengkawha theihtawp chhuaha consumer-te dikna leh chanvo humhim tura thawktu a ni, a ti a. Consumer lungawilohna neite'n District leh State Commission-a an vuivainate an thlen kawngah MCU-in theihtawp a chhuahpui thin leh eirawngbawlna gas home delivery kalpui a nih theih nana an hmalaknate chu chhuanawm a tih thu sawiin, District tina consumer organization din leh high school chin chunglam zirna ina consumer club din tura hmalak a ni chu lawmawm a tih thu a sawi a. MCU chu consumer-te dikna leh chanvo humhim kawngah an innghahna bulpui 6 te hre renga theihtawp chhuah turin a chah nghal bawk.

Governor chuan Sawrkar laipuiin Department of Consumer Affairs kaltlangin consumer-te hmakhua ngaia kawng hrang hranga hma a lak thu sawiin, e-commerce leh online platform hrang hranga thil lei thinte tana hmalak sak thei turin Consumer Protection Act, 1986 chu herdanglamin dan thar Consumer Protection Act, 2019 siam a ni, a ti a. Bureau of Indian Standards (BIS) Act, 2016, Legal Metrology Act, 2009 leh consumer-te hrilhhriatna 'Jago Grahak Jago' campaign chungchangte pawh tarlangin, consumer-te tan lungawilohna thlenna tur National Consumer Helpline (NCH) toll-free number 1915 chu tawng 17 a siam a nih thu a sawi a. Changtlung zawk turin NCH 2.0 duan mek a nih thu leh Integrated Grievance Redressal Mechanism (INGRAM) portal hmanga complaint a theh luh theih thu a sawi a bawk.

Khualzahawm Supply Director Pi Saizikpuii chuan tunhnaia technology thang chak takin e-commerce lamah hmasawnna thlen bawk mah se, hemi kentel inbumna awm thinte lakah consumer-te dikna leh chanvo kan humhalh tlat a tul a ni, a ti a. Consumer-te dikna leh chanvo humhalh sak leh zirtirna pek kawngah Nodal Department leh MCU-te tha thlah lova tanrual zel a pawimawh thu sawi bawk.

He hun hi MCU Vice President Pu Thanglura chuan kaihruaiin Sr. Adviser Rev Robawiha'n hunserh a hmang a. MCU President Prof. Chawngsailova'n thu a sawi bakah General Secretary Pu H. Lalbiakpuia'n report a pe a. Chawhnu lamah rorel inkhawm neih niin hruaitu thar an thlang nghal bawk.

MCU hian tun dinhmunah Aizawlah Hqrs. a neih bakah District tinah Sub-Hqrs. a nei a. Branch 180 leh Club 60 a nei mek bawk.