3484/2024-2025

Champhai, 12th December 2024: Chief Minister Pu Lalduhoma chuan nizan khan Aizawl District pawna a hmasa ber ni turin Champhai Chhangphut Field Stadium Flood Light chu a hawng a. Sports Minister Pu Lalnghinglova Hmar chuan khual zahawm niin CM hi a ṭawiawm a ni.

Flood Light hawnna inkhawmah hian Chief Minister Pu Lalduhoma chuan Champhai khua leh District tana thil chhinchhiahtlak tak, zan lama inkhelh theihna hawn a ni ta chu lawmawm a tih thu a sawi a. Mizoram sawrkar chuan infiamna kawnga hmasawnna thlen a duh a, he tih rual hian ram sum leh pai dinhmun hre chungin thil pawimawh dang - inkalpawhna kawngpui tha, zirna ṭha leh a zirna in ṭha, hriselna lama inenkawlna ṭha zawk te, Police thuam chakte leh kuthnathawktute chawi kan te nen hmasawnna inbuk tawk kalpui a tum a ni, a ti.

Pu Lalduhoma chuan sawrkarna an chan hnua project lian tham an kalpui hmasak ber te zinga mi ‘Chhangphut Field Flood Light’ kum khat chhunga hawn theih a ni ta chu lawmawm a tih thu a sawi a. Mizoram sawrkar chuan ‘Ban a kaih’ hnuaiah infiammi theihna nei ṭha te zawng chhuak turin cheng vaibelchhe 2.5 a ruahman tih sawiin, kum thar aṭangin hmalak ṭan tum a ni, a ti a.  Chief Minister hian “Sports-ah kal tum dan neiin, tinzawn neiin kan kal zel dawn a, infiamna hmunhma siamte ngaihthah chuang loin, chu'ng hmunhmaa infiam tur infiammite chu ngaih pawimawh zawka nei chungin kal zel kan tum,” a ti  bawk.

Chief Minister hian Khankawn Police Check Gate aṭanga Champhai khawpui panna kawngpui chu SASCI V hnuaiah cheng vaibelchhe 6.6 senga laih zauh tum mek a ni tih a tarlang a, kumthar lamah hna ṭan theih a beisei thu a sawi. Champhai khawpui leh a chhehvel khua te chawm thei turin Vapar khaw chungah tuikhuah siam tum a nih thu Chief Minister hian a tarlang bawk a. A hmunhma pawh khualzinte hip thei tura cheibawl a, sangha dil lian te siam a, seaplane te pawh an ṭum theihna turin ruahmanna siam a ni, a ti a. A concept paper pawh NBCC (India) Ltd, New Delhi te hnenah thawn thlak a ni tawh tih a sawi. 

Khual zahawm Pu Lalnghinglova Hmar chuan Champhai Chhangphut Field Flood Light hawnna hun hlimawm tak hman a ni thei chu lawmawm a tih thu sawiin, “Sawrkar tharin project lian tham kan thawh a kan zawh hmasak ber pawl a ni,” a ti. Sports Minister chuan mizo ṭhalaite chu football mai ni lo, infiamna dangah pawh hlawhtling turin sawrkarin a duhsak tih sawiin, India sawrkarin Olympics 2036 thleng tura ruahmanna a kalpui mek zulzuiin Sports Discipline thlan bikah hmalak tum a ni, a ti.

Pu Lalnghinglova Hmar chuan Mizoram sawrkar flagship programme ‘Ban a kaih’ hnuaiah infiammi te chu sawrkarin an banah a kai dawn a, a bulṭanna atan Champhai District chhung ami Tuipuiral Games-ah infiamna thar pahnih telh thar tum a ni a, Tuichangral Games-ah pawh infiamna thar pathum telh tum a ni, a ti.

Sports Minister chuan hmunhma ṭha neih chu a pawimawh rualin, a pawimawh ber erawh infiammi te an ni tiin sawrkar chuan an hmasawnna turin hmalak a tum a, a tlanchhe dawn lo, a ti a. ‘Ban a kaih’ hnuaia Infiammi theihna nei te zawng chhuak tura cheng vaibelchhe 2.5 pe chhuak tu Chief Minister, Finance Minister ni bawk hnenah lawmthu a sawi a ni.

He hun hi Mizoram sawrkara Sports & Youth Services Secretary Pu Lalramsanga Sailo chuan a kaihruai a. Pu Henry C. Lalrawnkima, Secretary, MSSC chuan report a pe a. Pu C. Hualrikhuma, President, CDFA chuan Chhangphut Field chanchin a sawi a, infiamna hmunhma ṭha tak an neih theihna tura hma lak sak ṭhin tu Mizoram sawrkar bakah phal taka ram petu Pu Chalbawia, Pu Damliana leh Pu Lalvena Khiangte te chungah lawmthu a sawi a ni. 

Chhangphut Field Flood Light hawnna hunah hian Adviser to CM, Champhai North bialtu ni bawk Er. H. Ginzalala, South Tuipui bialtu MLA Pu Jeje Lalpekhlua, Mizoram KVI Board Chairman Pu Lalremliana, Champhai Bawrhsap Pu VL Remliana, SP Pu Shivendu Bhushan leh sawrkar official dang te an tel a ni. 

Champhai Chhangphut Field-a Lighting System (Stadium Flood Light) hi Special Assistance to State for Capital Investment (2023-2024) Scheme hnuaia sum cheng nuai za li sawmnga leh pasarih (₹ 457.00 lakhs) hmanga sak a ni a. He hna thawk tur hian RS Construction and Consultancy, Tanhril, Aizawl chu thlan niin work order March ni 15, 2024 ah pek chhuah a ni a. Chhangphut Field-a Flood Light bun hna hi March ni 25, 2024 ah thawh ṭan a ni a, November ni 12, 2024 khan zawh fel a ni.

He Lighting System-in a ken tel hrang hrangte chu -

1) Stadium Flood Light: Chhangphut Football Field-a zana inkhelh theihna tur atan hian Flood Light hmun li (4)-ah dah a ni a, A ban san zawng hi meter 30 /feet 98.4 theuh niin, ban tinah hian metal halide light hmang lovin LED Flood light 50 (1000 watts) zel dah a ni a. Ban tinah hian a ṭul huna lawn theihna turin kailawn (lift) dah vek a ni.

2) Generator: Stadium Flood Light chawmtu atan Diesel Generator 250 kVA pakhat (1) bun a ni a. Field-in a mamawh dang Pavilion leh Gallery tih enna bakah Sound System chawmtu atan 125 kVA dang bun nghal a ni bawk.

3) Light en that dan (standard): Champhai Chhangphut Field Flood Light en zawng hi a tehna bik lux-meter hmangin field chhung hmun/point 34 laiah teh a ni a, a en that dan chu chawh rualin 1744 Lux a ni. Hei hi FIFA pawmpui (FIFA Lighting standard) niin, FIFA hnuaia intihsiakna hrang hrang pawh khelh theihna tur khawpa eng tha nia ngaih a ni.