Mizoram Excise & Narcotics Department chuan tunhnai khan US Embassy, New Delhi atangin an nitin hnathawhna atana hman tur khawl chi hrang hrang an dawng a; heng khawl tharte hi vawiin chawhnu dar 2:00 khan Excise Minister Pu J.H. Rothuama chuan a enpui a, Col Z.S. Zuala MLA chuan Minister hi a tawiawm a ni.

Hetianga an hnathawhna tur hmanrua mamawh sawipui hian Excise Commissioner Lalbiakmawia Khiangte chuan nikum July thla khan US Embassy, Kolkata chu a tlawh a. Hemi bawhzui hian US Consul Pu Clinton S. Brown chu nikum December thla khan Mizoramah a rawn zin a, hemi tum hian Mizoram Excise & Narcotics Department pisa chu tlawhin an hnathawh dan kalhmang leh harsatna te chipchiar takin Excise hotute nen an sawiho a ni. US Consul hian Mizoram Excise chu theih ang anga tanpui a tiam a, ni 7.2.20012 khan khawl chi hrang hrang cheng 100,235,196/- (US Dollar 2004703.9) zet man chu Department hnenah hian US Embassy, New Delhi-ah Pi Herro Mustafa, Minister Counsellor for Political Affairs hian a hlan ta a ni. Heng hmanraw changkang ber ber te hman dan zirtir turin US atangin mithiam te lo kal thuai tura beisei an ni nghe nghe.

Ministry of Home Affairs atangin Mizoram Excise & Narcotics chuan tanpuina cheng 22,68,475/- lai a dawng dawn bawk a; he pawisa hi motor leh khawl chi hrang hrang leina atana hman tur a ni.