783/2026-2027
Aizawl, the 1st of June, 2026: Narcotics Control Bureau, Ministry of Home Affairs atanga ruihhlo donaa hman tur motor dawn chu vawiin khan Excise & Narcotics Minister Pu Lalnghinglova Hmar chuan Central YMA kutah a hlan. Vawiin chawhma dar 10:00 khan Conference Hall, Commissionerate of Excise & Narcotics-ah inhlanna hun hi siam a ni a, Bolero Camper leh Eeco Van pathum ve ve hlan nghal niin, Bolero Camper pathum dang chu kawngah a thang mek bawk a ni.

Excise Minister Pu Lalnghinglova Hmar chuan ruihhlo do kawnga thawhhlawk tak, Mizote tana pawl chhuanawm ni bawk YMA kutah an mamawh tak mai lirthei hlan a ni chu lawmawm a tih thu a sawi a. “Vawiin hi ni chhinchhiahtlak tak a ni. Ruihhlo donaah pawl hrang hrangin kan tih theih leh thatna zawn te, kan thil neih te a inang lo a. Kan theihna zawnah, kan hunlai theuha theihtawp kan chhuah hian kan ramin a chhawr a, Mizoram tan a hlu a ni” tiin, mahni insengsoa ruihhlo donaa hma la thin Central YMA hotute chungah lawmthu a sawi.

Minister chuan Sawrkar hmalakna hrang hrangah mipuiin neitu rilru an put loh chuan hlawhtlin a har tih sawiin, “Tourism leh Sports ah pawh kan infrastructure thahnem tak chu Public-Private-Partnership (PPP) kaltlangin mimal leh pawlin an enkawl mek a, PPP hi uar chhoh zel kan tum. Ruihhlo dona kawngah pawh tun aia hmasawn tur chuan department, YMA leh mipui kan tanrual zel a ngai a ni.” a ti. NCB Director General Pu Anurag Garg nen ruihhlo do kawnga Mizoram mamawh hrang hrang sawiin July 1, 2025 ah New Delhi-a inkawmna hun tha tak an neih thu a sawi bawk.

Central YMA President Pu R. Lalngheta pawhin Excise & Narcotics Department leh CYMA inkara thawhhona tha tak awm chu lawmawm a tih thu a sawi a. “Thawhhona tha zawk kan neih zel ka beisei a. Dan hriatna chungchang leh thildangah pawh department in min finchhuah zel ula, a tul chuan zilhhauna pawh dawng turin kan inhawng a ni.” a ti.

Pu T. Lalramzauva, Deputy Commissioner, E&N Department chuan report a pe a. March 15, 2025-a Home Minister Pu Amit Shah-a’n Mizoram a rawn tlawh tuma Central YMA in dilna an thehluh kal zel atanga motor te chu lei a nih thu a sawi. Ministry of Home Affairs thurawn angin dilna chu Excise & Narcotics Department kaltlanga thehluh niin, January 21, 2026 khan Bolero Camper paruk leh Maruti Eeco Van pathum lei nan cheng nuai 88.95 phalna hmuh a nih thu a tarlang a ni.

Vawiina motor inhlanna hun hi Pu C. Lalruaia, Secretary, Excise & Narcotics Department in a kaihruai a. Excise Commissioner Pu Z. Lalhmangaiha, officer leh staff te bakah Central YMA hruaitu engemawzat an tel a ni.