784/2026-2027

Dated Champhai, 1st June 2026: Hri danna pek chungchangah vawiin khan DC Conference Hall, Keifangtlangah District Task Force for Immunization an thukhawm.

He hun hi Pu Lalbiakfela, Addl. DC chuan kaihruaiin Dr. Lalramhluna, District Immunization Officer (DIO) chuan kum 2025 - 2026 chhunga Champhai District-a vaccine hrang hrang an pekchhuah dan report a tarlang a, HVP Vanccine hi thla thum chhunga kalpui turin India ram ah launch niin Champhai District ah naupang kum 14 leh 15 mi 786 te ah vaccine hi pek turin ruahmanna siam niin 819 pek an ni thung tih a tarlang a, January atanga May thla chhung khan Champhai District ah sentut hri vei nia rinhlelh mi 27 an awm a, enkawl dam tawhte pawh a tarlang nghal.

Dr. Lalhlimpuii, Survillance Medical Officer, WHO hnen atangin Sentut leh Rubella chungchanga WHO in hma alo lak tawh dan a tarlang a, WHO chuan kum 2025 khan khawvel pumah Sentut hri umbo tura a lak thu a sawi a, Mizoram ah pawh he hri umbo tura hma an lakna te a tarlang bawk. Hei bakah hian SMO Dr. Lalhlimpuii chuan naupang in vaccine a lak that loh chuan sentut hri hi a vei ngei ngei a ngaih a nih thu tarlangin ngaihthah a nih chuan thihna hial a thlen theih dan a tarlang a, kum 2025 khan Zokhawthar a raltlan naupang 45 laiin an kai thu a sawi a, thawktuten theihtawp an chhuahna zarah Zokhawthar khawchhungah hri hi a lut lo hlauh tih a sawi tel bawk. Naupangin sentut hri danna an lak that loh vanga hri an vei chuan sentut hri hian mi var a thlen a, tihdam theih a ni tawh lo thin, a ti.

Kum 1 hnuai lamin hri danna an lak that loh chuan Hepatitis B vei theihna chance sang tak an nei a, Hepatitis B hi a vannei chuan harsatna em em nei lovin an damchhungin benvawn angin an pai reng thei a, a vanduai chuan zu in miah lo pawhin thin ro a thlen theih bakah thin cancer te a thlen theih thu a tarlang a, Hepatitis B bakah Pneumonia pawh a thlen thin dan tarlang bawkin heng zawng zawng atanga kan fihlim theihna turin thawktuten theihtawp an chhuah leh zual a tul thu a sawi a, hri danna naupang tam thei ang berin an lak theihna tura thawkho a, tangrual turin kalkhawmte a chah a ni.

Thukhawm chuan Sub-National Immunization Day hman dan tur chungchang an sawiho a, he ni hi July ni 1, 2026 ah hman tum a ni a, he ni hian a tum ber chu zeng hri umbo niin Mizoram a umbo ni mek hi umbo zel a nih theihna tura hmalak chhunzawm zel chu a tum ber a ni a, naupang kum 5 hnuailam zawng zawngte chu zenhri danna hi pek an ni leh dawn a, hlawhtling taka vaccine hi pekchhuah a nih theihna turin mahni theihna zawn theuhah tan lo la turin kalkhawmte a chah bawk.

Thukhawm chuan Champhai District ah Sentut hri a darh hluai lohna tura hmalak dan tur an sawiho nghal a, hemi atana pawimawh ber chu nu leh pate an nih thu leh sentut hri ni awm a lang an faten an vei a nih chuan rang taka inentir nghal a pawimawh thu te thukhawm chuan an tarlang a ni.