3560/2024-2025

Aizawl, the 28^th November 2024 : Tukin khan Excise & Narcotics Minister Pu Lalnghinglova Hmar chuan Ray of Hope in ruihhlo ngaite tana camping ‘Holistic Detoxification Camp’ Agape Camping Centre, Durtlanga an buatsaih chu a tlawhin tanpuina sum a hlan a. Camp hi November ni 18 tan niin November ni 30 thleng awh dawn a ni.

He hunah hian Pu Lalnghinglova Hmar chuan ruihlo ngaite hi an tha thei lo tiin kalsan ta ila, a chhe ber leh thihna hial atan kan hnutchhiah leh kan kalsan tihna a ni dawn a, chuvangin theitawp chhuahin keimahni zawnah theuh kan theih ang angin an mahni chhanchhuahna leh mi pangnngai an nih leh theih nan țan kan lak a ngai a, chutah chuan kan beidawn a thiang lo, a ni, a ti. Camping a lutte chu an nihna an zahpui loh avangin mi huaisen a nih thu sawiin hun leh nun harsa in tawk a ni mai thei mahse nangni aia harsatna tawk nasa leh hliam nasa tawkte pawh Pathianin a khaichhuak a, beidawng lo ula, theihtawp chhuahin in hun hlui kalsan turin in rilru zawng zawng camping ah pe turin ka chah duh cheu ni, a ti. Kan hmalawka hunpui lo thleng tur Krismas hi in tan paltlang a harsa viau ang, mahse, zam suh u, Pathian tanpuina in in su tlang thei em em ang tiin a fuih bawk a ni.