3561/2024-2025

Siaha the 28th November 2024: Vawiin chawhma Dar 11 khan Mizoram Cooperative Apex Bank (MCAB) branch 30-na ni turin New Colony Branch, Siaha hawn a ni a, he hunah hian MADC CEM Pu M Laikaw chu Khuallian niin Pu Abraham Beirazi Khithie, Addl DC chu Khual zahawm a ni.

Pu M. Laikaw, Chief Executive Member, Mara Autonomous District Council MCAB branch thar hawng tura sawm a ni chu lawmawm a tih thu sawiin Siaha mipuite leh District tan hmasawnna ropui tak a ni a ti. Financial Literacy-ah Siaha District chu a la hnufual deuh avangin Branch thar chuan nasa taka hmasawnna a thlen a beisei thu a sawi bawk.

Additional DC, Pu Abraham Beirazi Khithie chuan Apex Bank chu mipuite tan dawr nuam a tih thu sawiin chhawm nung zel turin a fuih a. District pumah Financial Literacy Campaign nasa zawka neih a pawimawh thu leh PACS Cell te tam zawk din a tul thu a sawi bawk a ni.

Siaha-ah hian kum 1986 khan MCAB Saiha Branch hawn a ni a. Khawpui thang zel leh mipui mamawhna san zel avangin New Colony vengah Branch thar hi hawn belh a ni leh ta a ni. Hawnna inkhawm hi Pu Lalrinchhana, Vice Chairman MCAB in a kaihruaia, Pu H. Lalramdina, Assistant General Manager-in Technical Report pein Pu P. Lalsawmliana, General Manager-in lawmthu sawina hun hmangin programme hi khar a ni.