3562/2024-2025

Dated Hnahthial the 28th November, 2024: Vawiin khan Hnahthial DC Meeting hall ah Bawrhsap Pi Rita Lalnunmawii Pachuau kaihhruaiin ‘Sanitation Task Force’ thutkhawmna neih niin Mizoram Cleanliness Competition te, YMA Branch fai inelna leh khawpui cheimawi hna kalpui dan turte rel ho a ni.

Bawrhsap chuan fai hi changkanna anih thu sawiin faina hi District changkan leh changkan loh tehfung pawimawh tak pakhat anih thu a sawi a. Hnahthial khawipui chhung, town area chuan Hnahthial district chhunga khaw dang chu faina kawngah an tluk mang meuh tawh loh thu sawiin chu vang tak chuan faina kawngah tan lak that a tul a ni a ti a. Hemi kawngah hian sawrkar ngawt a innghat lovin VC leh YMA ten tan an lak that a tul thu a sawi a. Faina inelna huaihawt nikhua a veng leh a chhehvel han tihfai chu thil tha tak ni mah se fai reng tur chuan mitinte an pawimawh theuh thu sawiin hemi atan hian veng leh khawtlang hruaitute chu an pawimawh hle thu a sawi a ni.

District Urban Development Officer, Pu Hmingmawizuala chuan kalkhawmte hnenah Mizoram Cleanliness Competition, 2024 kalpui dan tur leh endik dan tur hrilfiahna hun a hmang a. Mizoram pum huap faina inelna hi tun December lo awm tur, kar hnihna emaw kar thumnaah endikna neih tur niin Hnahthial chu District a nihna angin District Headquarters dangte nen an inel dawn a. Inelna atan hian tehfung (parameters) hrang hrang sawmpakhat (11) chhawpchhuah niin chung zingah chuan vantlang leh mimal hmun fai leh fai loh te, khawpui chhung cheimawi te, vantlang zunin fai leh fai loh te, side drain enkawl that leh that loh te bakah thil dang hrang hrangte a tel a ni.

Thutkhawmnaah hian YMA branch tinte tan faina inelna neih ni se ti a rel niin he Inter Branch Cleanliness competition hi December 1st week ah endikna neih tur a ni ang a. Hemi atan hian EE,PHED; Addl SP; DUDO leh DIPRO te chu judge atana ruat an ni. Naupangte tan Cleanliness club chu school leh YMA ten din se ti a rel niin Best Cleanliness Club hi nakkum atanga tanin kum tin thlan ziah tur a ni dawn bawk a ni.

He thutkhawmnaah hian khawchhunga hruizam (cable) hnawk chinfel dan tur chu ngaihtuah ho bawk niin current leh news emaw wifi cable hrim hrim mumal zawka Hnahthial District chhunga zam anih theih nan sub-committee din nise ti a rel a ni a. Hei bakah hian huap zau zawka faina kaihhnawih thu rel anih theih nan Task force mai ni lovin ‘Hnahthial Town Sanitation Committee’ din ni se tiin rel a ni bawk.

Thutkhawmnaah hian Pi Esther Leihang, SDO(S); Pu Hmingmawizuala, DUDO; Pu Lalhmangaihhlua, Addl SP; Pu Darthangvunga, EE(PHED); Dr. Lalsanglura, CMO; Pu F.Lalrinfela, DIPRO; Pu C.Lalzarliana, Dy DPC; Pu Lianhmingthanga, JE, UD&PA; Pi Julie Hmingthantluangi, Inspector of Sanitation, UD&PA; Pu F.Laldinthara, HDVCA President; Pu C. Lalbiakkima, Sub-Hqrs YMA President bakah Pi Lalthanpuii, Sub-Hqrs MHIP aiawh te chu an tel a ni.