3563/2024-2025

Dated Hnahthial the 28th November, 2024: Vawiin khan Hnahthial DC Meeting Hall-ah Bawrhsap Pi Rita Lalnunmawii Pachuau kaihhruaiin District Consultative Committee (DCC), District Level Review Committee (DLRC) leh District Level Security Committee (DLSC) chu quarter ended September, 2024 atan neih a ni.

He hunah hian Hnahthial Bawrhsap chuan bank hnathawh leh hmalak dante thlir letna hun pawimawh tak neih theih thin a ni chu lawmawm a tih thu sawiin mipuite tan bank chu tangkai lehzuala an thawh theih nan heng thutkhawmna hi a pawimawh thu a sawi a. Mipui thenkhatin pawisa thir (coins), a bikin Rs. 10 thir an pawm duh lo thin te leh pawisa inkir nan a sweet hman thin chu tih tawh loh ni se a duh thu sawiin hemi atan hian bank te chu tan la lehzual turin a chah a. Mipui nawlpuiin an mamawh leh sawrkar scheme awmte tana loan leh hamthatna dang dil theihte chu mipui ten awlsam leh rang zawka an hmuh theih nana hma an lak tawh thinna chu fakawm a tih thu sawiin a aia nasa lehzual zawka tan la turin bankte chu a sawm bawk a ni.

Pu H Lalhlimpuia, Lead Bank Office, Lunglei chuan Security leh pawisa management chungchangah chuan harsatna a awm loh thu sawiin Social Security Schemes PMSBY leh PMJJBY atan GP 26 cover tawh anih thu sawiin PMJJBY ah 153.85% bakah PMSBY ah te 117.87% enrollment neih tawh niin an target chu an khum tawh thu a sawi a. Non Performing Assets (NPA) chu quarter hmasa nen thekhin chuan total other priority sector tih lovah chuan hma an sawn tawh thu a sawi bawk a ni. Financial Literacy Camps(FLC) bank hang hrang, MRB, MCAB leh SBI ten an kalpui zat thlir letna neih niin FLC chu quarter tinah vawi 3 tal kalpui theih ni se tih a ni.

DLRC hnuaia agenda hrang hrang chhawp chhuahte thlir hona neih bawk niin Cash-Deposit ratio chungchang en hovin pawisa deposit leh loan pek chhuah chu quarter hmasa aia a tam thu leh CD ratio chu quarter hmasa aia a tlakhniam thu report pek a ni. Hei bakah hian ACP, priority leh non priority sector chungchang report te en ho nghal a ni a. Sawrkar sheme hrang hrang, KCC, PMEGP, PMMY leh PMJDY hnuaia loan pekchhuah leh account hawnah a tlangpui thuin hmasawnna hmuh anih thu tarlan a ni bawk. Hnahthial District a bank branch hrang hrang hnuaia savings leh current accounts te chu March 2025 hmaa digitalizated vek hman tura lo inpeihfel turin bank hotute chu chah an ni bawk a ni.

Thutkhawmnaah hian line department hrang hrang hotute; Hnahthial branch a SBI, MRB leh MCAB hotute bakah tlawmngai pawl hruaitute an tel a ni.