1250/2026-2027

New Delhi, the 1st of July, 2026: New Delhi-a cham mek Pu Lalnghinglova Hmar, Minister of State (i/c), Excise & Narcotics Department leh Pu Anurag Garg, IPS, Director General, Narcotics Control Bureau te chu vawiin chawhnu dar 12:30 khan New Delhi-a Director General office-ah an inkawm a, Mizorama ruihhlo do kawnga hmalakna kal mek leh hmachhawp hrang hrangte an sawidun.

Mizoram Excise Minister Pu Lalnghinglova Hmar chuan ruihhlo do kawngah Excise & Narcotics Department in awmze neia theihtawp a chhuahna chuan rah tha a chhuah mek tih a sawi a. “Kum hnih emaw lek chhungin heroin no. 4 man nasa takin a sâng tawh a, sawrkar department leh tlawmngai pawlte thawhho that zarah ruihhlo man zat pawh a pung zel. Ruihhlo hi a rem ta a ni lo a, a hma anga a tlawm ta lo hi a vang sawt niah kan ngai,” tiin, kohhran leh khawtlang nen tangrualin ruihhlo ti lo tura inzirtirna pawh kalpui reng a nih thu meeting-ah hian a tarlang a ni.

Pu Lalnghinglova Hmar chuan Narcotics Control Bureau puihna hrang hrangah lawmthu a sawi a, “Tun hnaiah NCB atangin ruihhlo donaa hman atan motor engemawzat kan dawng a, tangkai taka hman mek a ni. Mizoram chu Myanmar ramri depa awm, India rama ruihhlo rawn luhna kawngka pakhat a nih avangin ngaihpawimawh a ngai a. Excise & Narcotics Department in Ministry zawmpui a neih ve loh avangin, chak zawk leh awmze nei zawka hma la turin NCB nen thawhhona tha zawk kan neih zel a ngai a ni.” a ti. Ruihhlo donaa hman tur motor mamawh belh a nih thu a thlen nghal bawk.

NCB Director General Pu Anurag Garg chuan ruihhlo do kawnga Mizoram hmalaknate chu an lo hriat thin thu leh lawmawm a tih thu a sawi a, Minister thu thlente pawh theihtawp an chhuah tur thu a sawi. Aizawla NCB Zonal Office dinna turin approval a awm tawh tih sawiin, a tihhlawhtlin kawnga hma lakpui turin Mizoram Excise Minister chu a ngen nghal a ni.

Pu Anurag-a chuan ruihhlo zuar leh tawlh mante chu an phu tawk hremna pek ngei a pawimawh tih sawiin, chumi atan NDPS Act 1985 hnuaia Special Court din leh, man nawn fo (habitual offender) te khuahkhirh theihna dan hman tangkai tha a tih thu a sawi bawk.

Meeting-ah hian ruihhlo do kawnga tangkai tak, sawrkar hnathawk leh informer te cash award dawn thin, NCB a awm mek chungchang pawh sawiho a ni bawk.

Meeting-ah hian Mizoram Excise Minister hi Pu H. Lalramenga, PS in a tawiawm a. NCB atangin Pu Vineet Vinayak IPS, Additional Director General leh Pu Neeraj Kumar Gupta IPS, Deputy Director General (Operations, Enforcement, and Operational Coordination) te an tel bawk a ni.