1251/2026-2027

Kolasib, 1st July, 2026: Vawiin khan Brig. C. Vankunga Shopping Centre Conference Hall, Diakkawn, Kolasib-ah Kolasib Bawrhsap Pu H. Dolianbuaia hovin Brig. C. Vankunga Shopping Centre Management Committee thutkhawmna neih a ni a. He thutkhawm hi Kolasib Additional Deputy Commissioner Pi B. Malsawmtluangi chuan a kaihruai a ni.

Thutkhawmah hian Bawrhsap Pu H. Dolianbuaia chuan thu sawiin, Kolasib chu khawpui thang duang tak a nih mek thu a sawi a. "Chutih rualin, sumdawnna hmunpui (commercial hub) a la nih chiah loh avangin thil man pawh hmun dang ngaihtuahin a la sang deuh a. Mipui vantlangin sumdawnna lama rilru pek aiin huan leh lo ram lamah ngaihtuahna kan seng tam zawk niin a lang," a ti. Sumdawnna hmunpui lian siam tura tan lak a ngaih thu sawiin, Brig. C. Vankunga Shopping Centre pawh changtlung zawk leh mipuite hman tangkai theih dan tur ngaihtuah a pawimawh hle a ni, a ti bawk.

Vawiin thutkhawmah hian Brig. C. Vankunga Shopping Centre chei that dan tur leh tangkai zawka mipuiten an hman theih dan tur ngaihtuah ho a ni a. Mipui vantlang tam zawkin he Shopping Centre hi an hriat a, an dawr tam theih nan social media hrang hrang hmanga thehdarh (promote) nise tiin ruahmanna an siam a ni.

He hunah hian Pu H. Lalramliana, District Urban Development Officer (DUDO), Kolasib hnen atangin Shopping Centre enkawl dan te, sum dinhmun tlangpui leh sum hman ral dan report ngaihthlak a ni a. Report-a a lan danin tun dinhmunah sum hman bang cheng nuai ruk (Rs. 6 lakhs) a awm mek a ni.

Brig. C. Vankunga Shopping Centre, Diakkawn hi Mizo chhiar danin chhawng li a ni a. Tun dinhmunah a hnuai ber (Ground Floor) hi Two Wheeler leh LMV (lirthei te chi) hun nan hman a ni a. Chhawng khatnaah hian dawr 16 a awm a, chhawng hnihnaah dawr 17 a awm bawk. Chhawng thumna hi Conference Hall tiamin mimal hnenah enkawl turin pek (outsource) a ni a. A chung ber chhawng linaah hian mimal enkawl Gym a awm mek bawk a ni.