Vawiin khan Excise & Narcotics Department chuan Aijal Club-ah Kumthar thingpui inhona hun an hmang a. He hun hi Pu Lalhmunsanga, Dy. Commissioner, Excise & Narcotics-in a kaihruai a, kum kalta 2012 chhunga Excise & Narcotics Department-a thawk boral ta mi 5 sunna hun hman nghal a ni.

Excise & Narcotics Department thingpui in hona leh inhlan tharna inkhawm hi Excise Minister Pu J.H.Rothuama’n a hmanpui a. Minister chuan he Department-a thawkte Kumthar chibai a buk a, Krismas leh Kumthar tluang tak leh tha taka hman liam a ni thei chu lawmawm a tih thu a sawi. Department-a thawkten zu leh ruihhlo khuahkhirhna kawngah theihtawp chhuah a, an thawhnaah lawmthu a sawi bawk a. Excise Department hi Zofate hmalam hun atana pawimawh leh Mizo thalaite hmalam kawng sialtu pawimawh tak a nih avangin Department-a thawkte chu zu leh ruihhlo dang laka fihlim tura insum thin turin a chah a ni. Hnathawktu indaih tawk lohna avang leh hmanrua duh anga tha neih loh avanga hnathawhna kawnga harsatna awm thin leh hnufumna eng eng emaw awm mahse mualpho lo leh harsatna lian awm lova Excise & Narcotics Department a kal zel thei chu lawmawm a tih thu a sawi bawk.

Pu Lalbiakmawia Khiangte, Commissioner of Excise & Narcotics chuan an Department-a thawkte chu Mizo nunphung tha leh zonun mawi vawng nung tur leh ngaihlu turin a chah a ni