Excise & Narcotics Department hnuaia Lawngtlai Station din thar chu vawiin khan Lawngtlai Chandmary Venga an office tur, Pu LZ Tluanga Building-ah Lawngtlai East bialtu MLA, Agriculture Development Board Vice Chairman ni bawk Pu H. Biakzaua'n a hawng.

Pu H. Biakzaua chuan Lawngtlai District-in a la neih ngai loh Excise & Narcotics Station thar din a ni chu lawmawm a tih thu sawiin, Mizoram sawrkar chungah District mipui ai awhin lawm thu a sawi a. Lawngtlaia department hrang hrang tichangtlung a, tiphuisui turin Mizoram sawrkarin hma a lak mek thu sawiin, Lawngtlai-III-a lei tla hniamin national highway kawngpui a tihchhiat pawh MoRTH Special Secretary & Financial Adviser-in kawng enkawltu NHIDCL te hma la tura a hrilh angin hma lak thuai a nih a beisei thu a sawi. Pu H. Biakzaua chuan Lawngtlai District chu ramria awm a nih avangin ruihhlo tawlh luhna kawng a nih a hlauhawmin, fimkhur a tul hle tih a sawi a. Excise & Narcotics Department chu thalaite nunna suattu leh ram sum luan raltirtu ruihhlo chi hrang hrang tirem a, chhungkua leh vantlang nuna malsawmna thlentu a nih ngei a beisei thu sawiin, thawktu awm thar turte chu ram mipui leh khawtlang tana thahnem ngai taka thawk turin a chah nghal.

He hun hi Deputy Commissioner of Excise & Narcotics (Enforcement) Pu Z. Lalhmangaiha'n a kaihruai a. Lairam Isua Krista Baptist Kohhran (LIKBK)-a Associate General Secretary i/c Service Rev. Dr LH Lalpekhlua'n hunserh hmangin, Lungleia Assistant Commissioner of Excise & Narcotics Pu Lalhmingthanga'n report a pe a. Lai Autonomous District Council (LADC)-a Chief Executive Member (CEM) Pu T. Zakunga, Chandmary bialtu MDC Pu C. Lalsawmzuala leh MNF Lawngtlai District Headquarters-a Treasurer Pu NC Nguntlunga te'n thu an sawi a. Assistant Commissioner of Excise & Narcotics (Headquarters) Pu Peter Zohmingthanga'n lawm thu sawiin, BCM Bazar Veng Lawngtlai kohhran upa, Upa K. Zozamliana'n lawm thu sawi tawngtaina hun a hmang bawk.

Lawngtlaia Excise & Narcotics Station thar hawnnaah hian LADC-a executive member leh MDC-te, sawrkar official-te, tlawmngai pawl leh political party hrang hrang hruaitute leh journalist-te bakah, department-a thawkte pawh an tel a ni.

Lawngtlai Excise & Narcotics Station thar hi inspector-in a awp dawn a. Sub-inspector pahnih, driver pahnih leh thawktu dang (other rank) 13 an awm dawn a ni.