Vawiin khan Mizoram Middle School Teachers Association (MSTA) General Headquarters hnuaia Academic Sub-Committee hmalakna in zirna chungchanga zirchhiana an neih Education Survey 2019 Report, SCERT Auditorium Chaltlang ah an tlangzarh.

He Survey Report tlangzarhna inkhawm hi MSTA President Pu Rosangzuala Ralte in kaihruaiin, Pi.Laldawngliani Chawngthu Director SCERT -in Survey Report a tlangzarh a ni. School Education Department, Health & Family Welfare Department, Social Welfare and Tribal Affairs Department leh Police aiawhte bakah NGO leh Zirna peng hrang hranga hruaitute chu an tel a ni.

Survey hi thla 10 chhunga buaipuiin mi 1135 an kawm a. He Report atana mi Inhlawhfa mite, eizawnna tenau dang leh Sumdawng lian buaipui te, Firm leh Company hnuaia thawk mek te, Lehkha thiam hna nghet thawk lai leh Sawrkara hna sang thawk te, Center leh Jaila awm mek te, Ruihhloin a tihbuai mek te bakah hna mumal thawh nei lova khawlai leng vel thin te hmaichhanah kawmna an nei a.

He Report atanga a landan chuan hna thawk peih leh sum thawk chhuak peih te zingah Sawrkar School-a Primary leh Middle School kal chhuak an thahnem hle a. Hnasang thawk leh Lehkhathiam hnanghet nei te bakah Saptawng hman tulna Firm leh Company hnuaia thawkte ah pawh Sawrkar School chhuak an tam zawk hle a ni.

Thalai intichangkang leng vak vel zingah erawh chuan Sorkar school chhuak an awm meuh lo. Hnasang thawk leh lehkha thiam tak te zingah ruihtheih thila buai an awm mang lova. Mi tam tak te zuk leh hmuam leh ruihtheih thila fihlim lo an awm laiin hetiang  thila fihlim leh insum thei an pung tawh hle. Kawng dik leh tha lama inzirtirna a nasat phawt chuan Mizo thalaite hi kaihhruai nuam tak leh hmasawn mi kan nih avangin heti lama hmalak chak a tul em em a ni tih hriat chian a ni bawk.