2277/2024-2025

Aizawl dated 28th September 2024: Tukin khan Pu Lalnghinglova Hmar, Minister, Excise & Narcotics Department chuan Tuivamit Branch YMA buatsaih a 'Ruihhlo do kawng zawh' a telpui a. Pu Biaksangzuala, President, Tuivamit Branch YMA chuan hun kaihruaiin Prof. Lalnuntluanga, Vice President, CYMA leh Pu H. Zakima, Chairman, Local Council, Tuivamit te chuan fuihna thu an sawi a. Tuivamit atangin Ramrikawn, FCI Godown peng thleng kawng zawh niin Ramrikawnah intawhkhawm a ni.

Excise Minister Pu Lalnghinglova Hmar chuan ruihhlo duh loh lantirna kawng zawh chuan khawtlang a ruihhlo zalen leh hluar lutuk tur a ven bak ah thlalaite hnen ah ruihhlo ti lo tur a thu chah pawimawh tak thehdarhna a nih thu a sawi a. Ruihhlo lak a fihlim tur a khawtlang hmalak thinna chu fakawm a tih thu a sawi. Minister chuan ruihhlo do hlawhtling tur chuan Sawrkar hmalakna piah lam ah tlawmngai pawlte thahnemngaihna a pawimawh thu sawiin Sawrkar, khawtlang, kohhran leh tlawmngai pawl hrang hrang tanrual a tul thu a sawi a. Kohhran leh khawtlang ah ruihhlo that lohna inzirtir tam a pawimawh thu leh khawtlang anga ruihhlo ngaite enkawl leh zirtirna tha pek a hmalak a pawimawh thu a sawi bawk a ni. Khawtlang ralmuang leh hmasawn siam tur chuan ruihhlo lak a fihlim khawtlang siam hmasak a tul thu Excise Minister chuan sawiin ruihhlo chu ram leh hnam hmasawnna tithuanawptu a nih thu a sawi a, ruihhlo do rem tum a hma la zel turin kalkhawmte a fuih bawk a ni.