3517/2024-2025

Dated Hnahthial, the 13th December, 2024: Vawiin khan Excise & Narcotics Department (END) Minister, Pu Lalnghinglova Hmar chuan Hnahthial District-a ruihhlo ngawl veite enkawlna hmun, Jehova Jire Camping Centre a tlawh a. Bialtu MLA Pu Jeje Lalpekhluan a tawiawm a ni.

Minister chuan Hnahthial district an rawn kal chhan lian tak pakhat chu ruihhlo do anih thu sawiin heng ruihhlo ngai, an chhungte ngei pawn enkawl ngaihna an hriat tawh lo enkawl tura in pe zo taka, anmahni puihna tur atan a he Camping Centre dintu, Pu Hmingthanzuala te chhungkua chu fakawm a tih thu a sawi a. Ruihhlo do hi kan bansan thiang lo a ni tiin peihloh san mai lova bei fan fan turin camping centre enkawltute chu a sawm a. Camping centre a awmte chu LESDE hnuaiah Skill Training neihpui an nih theih dan kawng a lo zawnsak tur thu sawiin END hmingin Camping Centre neitu hnenah pawisa fai cheng 10,000 a hlan a ni.

Jehova Jire Camping Centre neitu leh Sub Headquarters YMA President ni bawk, Pu Hmingthanzuala chuan ruihhlo ngawl veite hi mi neinung ai mahin mi rethei an ni thlangpui hi veiawm tiin chu chuan rukruk leh sualna dang a lo keng tel thin tih a sawi a. A tawnhriat atangin a ti tawh ngheitir hi chu thil harsa tak anih thu sawiin a la ti ve miah lo te hnenah ti ve lo tura nasa taka tlangau hi thil pawimawh tak a nih thu a sawi.

He hunah hian Minister hnenah Hnahthial District Football Association chuan duhsakna thilpek an hlan nghal bawk a ni.