4840/2025-2026

Aizawl, the 16th of March, 2026: Vawiin chawhma dar 11:45 khan Pu Lalnghinglova Hmar, Minister of State, Excise & Narcotics Department chuan Excise & Narcotics Department Golden Jubilee hawnna chu Conference Hall, Commissionerate of Excise & Narcotics, Aizawl-ah a hmanpui a, Golden Jubilee Monument a hawng nghal. Golden Jubilee kumah rilru thar pu a, department chak leh tha zawk lantir turin thawktute a fuih.

Excise & Narcotics Department hi kum 1976, March 15 khan bul tan niin a tirah chuan Excise & Taxation Department tih a ni a, hun kal zelah Excise Department tiha kalpui a nih hnuah kum 1996 khan Excise & Narcotics Department tia kalpui a ni. Minister Pu Lalnghinglova Hmar chuan, "Kan department hi miin min phurpui hle a, kan beisei phak bakin mipuiin min thlawp a. Kan hotute pawhin min duhsak a, kan thawhhona a tha tih a lanna a ni. Excise & Narcotics Department a ka thawhpuite fak ka duh che a, theihtawp chhuahin kan bei chhunzawm zel bawk tur a ni." a ti a.

"Bible a kan hmuh chu kum 50-na hi jubilee kum a ni a, jubilee kumah chuan inngaihdamna te, zalenna kumahte an hmang thin. Chuvangin kan jubilee kumah hian keini pawh kan inngaihdam a, thawhhona tha lehzual zawk a awm theih nan kan insiamthatna hun tur a ni. Zalenna kum a nih angin mi tupawhin, bawih tanna eng ang pawh a lo nei a nih pawhin, he jubilee hi min chhuah zalentu nise, hneh a zalen tura kan rilru kan siamna ni rawh se." a ti bawk.

Minister chuan sawi belhin, "Mihring atanga thlir chuan kum 50 hi kan vanglai a ni a, tawnhriat kan nei tha tawh a, thil tam tak kan lo hre tawh. Kan tha chak lai leh kan fin vanglai tak a ni. Chuvang chuan kum 50 tling tawh department chu a fing tawh tur a ni." a ti a. "Kan hna bul ber chu ruihhlo do a ni a, chuvangin kan do lamah kan tan hi a thiang lo a ni. Jubilee kum a nih angin heti lamah i tang thar ang u." a ti a ni.

Excise & Narcotics Department Golden Jubilee lawmnaah hian Thawhtanni tlai dar 5:30 khan 'Golden Jubilee Mei Det programme' chu Commissioner of Excise hovin hman a ni a. March ni 18, Nilainiah Aizawl leh District dangahte Golden Jubilee pual a thisen pek runpui neih a ni ang. March ni 19, Ninganiah Excise & Narcotics Department a thawktu hluite nen 'A Day with Pensioner' hun hman a ni ang a, March 20, Zirtawpni chawhnu hian Golden Jubilee kharna hun hman a ni dawn a ni.

Vawiin Golden Jubilee hawnna hunah hian Pi Zothantluangi, Additional Secretary, Excise & Narcotics Department pawhin thu sawiin, "Ruihhlo hi Zoram in kan buaipui em em a, hei vang hian kan department hi department pawimawh tak a ni. Chhungkaw tinin kan buaipui a, hmalam kan pan zelna turah pawh kan ram tana chona lian a nih avangin chumi do tur department a kan han thawk thei hi lawm takin, thahnemngai takin thawk ang u" tiin a chah a ni.

Golden Jubilee Opening Ceremony hi Pu Z. Lalhmangaiha, Commissioner, Excise & Narcotics Department chuan a kaihruai a. He hunah hian Excise & Narcotics Department hnuaia officer hrang hrangte leh Commissionerate of Excise & Narcotics a thawktute zawng zawng an tel a ni.