Hranghlui Mizo nunphung ziarang hrang hrang a taka mipui hma a pholanna ‘Exhibition cum Live Show on Material Culture’ chu vawiin khan DIET Auditorium-ah Champhai bialtu MLA Pu T. T Zothansanga chuan a hawng. He Exhibition, ni thum awh tur (15 – 17 November) hi North East Zone Cultural Centre (NEZCC) Dimapur leh Art & Culture Department tangkawpin DIET Complex chhungah an buatsaih a. Vawiin hawnna programme hi Pu Ngurbiaka, Art & Culture Director chuan kaihruaiin Pu B Sangkhuma, Exhibition Chief Co-ordinator chuan Exhibiton a lo zik chhuah dan leh thil hrang hrang an phochhuah chanchin a tarlang.

Pu T.T. Zothansanga chuan hnam zia rang hrang hrang hmun khatah pholanna hi thil vang tak leh awlai lo tak anih laia Art & Culture Department in mipui en leh hmuh theih a Mizo nunphung leh khawsak dan hrang hrang an pholan chu fakawm a tih thu a sawi. Pu Zothansanga chuan Mizo hnam nun inher chho mekah hian pipute thil leh hnam ziarang hrang hrang te hmusit lova, chawinunga, ngaihhlutna chang leh humhalhna chang kan hriat theuh a tul thu a sawi a. Thangthar leh naupangten pipute thil an hriat zel nan leh heng thil an hlutpui thiam nan kan hrilh leh zirtir chu mitin mawhphurhna a ni a ti bawk.

Exhibition cum Live Show on Material Culture ah hian Mizo ladeh dan chi kim, la her atanga puantah thleng te ; Belvuak leh bel siam dan te; Thiamhnang hrang hrang Emping, Kho, Thlangra leh thil dang an tah dan te, a taka mipui en theih turin an hnathawk lai ngei pholan a ni a. Exhibition-ah hian Mizoram State Museum-in thil hlui 40 vel an entir a; Mizoram State Archives-in Records hlui leh thalak 93 an pho chhuak a; Mizoram Academy of Fine Arts (MAFA), Mizoram Artist Society (MAS) leh Aizawl Art Gallery te chuan lemziah 25 vel an pho chhuak a, Tribal Research Institute in thlalak hlu tak tak 60 lai an tar chhuak bawk a ni. Tribal Research Institute hian Mizoram leh Mizo chanchin ziahna lehkhabu chi hrang hrang 40 vel an phochhuak a, lei nghal theih a ni bawk.

Zorimawi (traditional music) chi hrang hrang – Bengbung, Lemlawi, Darbu tum, Phenglawng, Tuiumdar, Bur tingtang, Tawtawrawt leh Hnahtum te, an tum lai entir a ni bawk a. DIET Main Building thlanga Boys Hostel kawt zawl-ah Mizo thang chi hrang hrang 14 kam a, mipui en theih tura dah a ni a. Heng thang te hi Thang tenau bakah Mangkhawng, Sakhi thang, Vathu fal leh Zawngtlak te an ni.

Exhibition cum Live Show-ah hian thil hrang hrang 318 entir niin henga thawktu thut chilh tlat chu mi 58, mipa 36 leh hmeichhia 22 te an ni. He programme kharna hun hi November ni 17 tlai dar 3:00 a neih tura ruahman a ni a, hetah hian On the Spot Painting Competition buatsaih lawmman sem nghal a ni ang.

Art & Culture Department chuan Exhibition cum Live Show hi tlawh turin sikul naupang, college zirlai leh mipui te an sawm a ni.