Vawiin khan Excise & Narcotics Minister Pu J.H.Rothuama hovin Champhai Grape Growers’ Society hruaitute leh Excise & Narcotics Department hotute chu Zawlaidi man bithliah chungchangah Minister pisa-ah an thukhawm a. Lungrual takin Winery atangin Zawlaidi um khat an hralhchhuahna theihna rate atan Rs.130/- chu pawm tlan a ni a, Aizawl-ah chuan Zawlaidi um khat hi Rs.193/- a vendor ten an hralh chhuah rem ti a ni.

Excise Minister Pu J.H. Rothuama chuan Zawlaidi man chungchang an bithliah danah grape chingtute hlawkna tur te, winery enkawltute hlawkna tur te leh a leitu tur mipuite tan a rualkhai thei ang ber tura Zawlaidi rate siam a nih thu a sawi a. Sorkarin kut hnathawktute a ngaih pawimawh thu leh kut hnathawktu ten an thawh rah hlawk taka an tel theih hi sorkar thil tum leh NLUP buatsaih chhan a nih thu a sawi bawk.

Vawiina meeting-ah hian Champhai Grape Growers’ Society aiawhin Pu R. Thangseia, Secretary; Pu Thankhuma, Committee Member; Pu Lalzuiliana, Committee Member leh Pu Chunglura, Manager, Champhai Grape Winery leh Excise & Narcotics Department atangin Pu Lalbiakmawia Khiangte, Commissioner; Pu Lalhmunsanga, Dy. Commissioner; Pu Ngurchungnunga Sailo, Asst. Commissioner leh Pu Rohlira, Under Secretary te an tel a ni.