Vawiin chawhma dar 10:30 khan I&PR Minister Pu Zodintluanga chuan Sialhawk khuaah Upa V.L. Thangzuala hriatrengna puala Football Tournament vawi 2 na chu a hawng. He tournament hi Pu Thanglianzauva te chhungkua in an buatsaih a ni a; Sialhawk khua atangin team 8 an tel a, khual khua atangin team 13 an tel bawk.

I & PR Minister Pu Zodintluanga chuan, “Mizoram sorkar chuan thalaite tana khawvel thar din turin theih tawp a chhuah mek a; infiamna leh infiammite chauh thlurbing lovin thalaite hmakhua tur zau zawkin ruahman mek a ni” a ti. Pu Zodintluanga chuan, “Infiammite hian tih tak takna thinlung kan put a tul a; infiamna tia kan sawi hi infiamna ni satliah lovin eizawnna tling a ni tih kan hriat thar a tul a. Tunah pawh hian Mizo thalai tam tak ten infiamna hi eizawnna atan an hmang mek a; kan infiammi chhuanvawrte zinga mi tam zawkte hi thingtlang thalaite an ni. Chuvang chuan, infiamna a ni emaw, lehkha zirna kawng a ni emaw, thingtlang lama kan thalaite hian mahni insitna rilru pu miah lo a mahni hmazawn kan sut a ngai a ni” a ti.

I & PR Minister chuan kan ramngawte humhalh a pawimawh zia sawiin, “Tlangram lo neih hmang chuan hawpkhawp thar a har a; chuvang chuan, sum chang thlai chin leh huan lo-ram nghet kan neih theihna turin sorkar chuan NLUP a ruahman a; he programme hi chhungkua, ram leh hnam hnuk khawih anih avangin a zarzotu zawng zawng ten theih tawp kan chhuah theuh a tul a ni” a ti.

Pu Zodintluanga hian a khaw paltlang khaw hrang hranga a department hnathawhte endikin khawtlang hruaitute nen hmasawnna hnathawh dan tur a hmunah an en ho a ni.