Lunglei District Hnahthial Sub-Division Hqrs.-a helipad hmun enin tukin zing khan South Tuipui bialtu MLA Pu John Siamkunga leh mi pawimawh thenkhat ten a hmunah an tlawh.

Helipad hi Rallangtlang-a awm niin tunhma sipai hmun hlui a ni a, Prime Minister hlui Pu Rajiv Gandhi pawh vawi khat chu helai hmunah hian a lo tum tawh a ni. Pu John-a chuan a hmun chu tha a tih thu leh tun hnaia sorkarin district khawpui zawng zawnga helicopter service tir a tum zingah Hnahthial pawh mipui nawrna vangin telh a nih tak thu a sawi a. Tuna helicopter service tur hian hmarchhak bial a huap dawn avangin awlsam takin zin kual leh damlo phurh a ni thei tawh dawn a, a chuan man tur hi 75% chu subsidise a nih thu leh mipuiten 25% chauh an chawi tur thu a sawi bawk.

Pu John-a hi nimin tlai khan Hnahthial khua thlengin a bial chhunga chhungkaw 30 te hnenah puan thui khawl a sem a, hei hi Lunglei District High Power Committee sum atanga pek a ni a, hmalakpuitu HPC Vice-Chairman Pu Joseph Lalhimpuia chungah bialtu MLA hian lawmthu a sawi a ni. Darzo kai Tuipui lei dawh tura sum mamawh cheng vaibelchhe 40 chu technical clearance hmuh veleh hna tan tum a nih thu leh Hnahthial-Haulawng inkar kawng laihna tur cheng vaibelchhe 52 a hmin tawh thu a sawilang bawk. Pu John-a hian tunkar chhung chu a biala hmasawnna hrang hrang tlawhin hun hman a tum a ni.